由王祖藍、郭晉安同萬綺雯擔正的《老表，你好嘢！》，周一（14日）首播高開31點（199萬觀眾），反應熱烈。劇中玩寸中港矛盾，導遊惡珍、D&G門口影相事件重現，但原來《老表》出位場面陸續有來，嚟緊有Bob（林盛斌）勾義嫂晒巨腩，許亦妮show巨胸脷誘張繼聰等，齋睇畫面係另類重口味。
第8集Bob半裸擒窗
Bob是郭晉安好友，但他在第7集醉酒之後竟然勾義嫂湯盈盈。事後醒來，湯盈盈一手執住假髮，至知Bob原來係光頭，嚇到O嘴。到第8集，郭晉安返屋企，Bob搞到要擒出窗「走鬼」。Bob全程肉騰騰，觀眾啖啖肥豬肉。
Bob勾義嫂東窗事發，搞到安仔發火。
條boxer係私伙。擒窗後我俾雨淋，搞到我真係淋病咗！
第5集騎呢舞姿
郭晉安為了𠱁一班小朋友開心，本來買咗巨星演唱會嘅門券，點知買錯咗假飛。為咗補鑊，佢請咗由王祖藍同王菀之組成嘅「Oh Baby」獻唱，好在「Oh Baby」嘅騎呢舞姿反而得小朋友歡心。
第5集公主扮咪咪
小歌星朱咪咪因欠租，最初收王祖藍為徒只是想呃佢錢，後來至知原來王祖藍係佢親生仔。少年版祖藍父親由祖藍做番，而後生版朱咪咪就係岑麗香。估唔到咪咪姐同香香公主都幾似。
年青版朱咪咪
第7集許亦妮出口術
張繼聰是王菀之男友，但同時和許亦妮飾演嘅名媛有路。許亦妮同張繼聰以殭屍look去派對，兩人互相伸脷引誘不特止，鏡頭仲不時close up許亦妮胸部，回家前又啜爆張繼聰隻手，仲留下唇印。
你簡直係亞太區最受歡迎男殭屍！
戲入面我同張繼聰不時玩挑逗，佢都有教我做戲。
第5集鬥扮老鼠
郭晉安、王菀之同萬綺雯帶埋一班小朋友去迪士尼。42歲嘅萬綺雯，同33歲王菀之一齊戴咗個米奇頭飾，估唔到萬綺雯唔sell長腿sell可愛都一樣掂。其實喺第6集，萬綺雯仲會喺回憶片段以中學look出場，睇落仲有幾分少女味㖭。
諷刺時弊
《老表，你好嘢！》反映不少中港文化差異，以及諷刺近年香港時弊。有網民認為劇情誇張失實，亦有人撐劇情只係揶揄現今香港出現嘅怪現象。
劇中講好多中港矛盾，好似第5集，來自內地嘅黃光亮，就冇綁安全帶揸車，之後又涉拋垃圾而同警員嘈。後來他教師奶教仔，反被師奶屈佢拐帶，明顯取材新聞。
挺《老表》
句句金
祖藍有份編劇《老表》，自然有唔少抵死對白，首兩周劇情已經有好多金句：
第4集：中女新解
你真係一個好大方嘅中女。我意思係好大方嘅中國女子。
第6集：寸盛女
究竟你哋嚟搵愛定揀菜？
第8集：戒花紙油
求婚最緊要「戒、花、紙、油」，即係戒指、鮮花、銀紙，同理由呀！
第8集飲假酒嘔白泡
黃光亮喺大陸請客，祖藍又飲茅台又喪食，好似阿燦上身一樣。點知飲到假酒，卒之搞到口吐白沫，要眾人合力送佢入醫院。去到醫院，大家仲以為救唔番，差啲樂極生悲。
你唔好嚇我呀！
第5集屁股開花
飾演王祖藍老竇嘅黃光亮，因為王祖藍堅持要到香港發展歌唱事業，唔肯繼承家族生意，父子時常爭執，黃光亮更嬲到打祖藍pat pat。
第6集鹹濕蘇基
蘇基今次飾演一名出席盛女節目嘅鑽石王老五，佢睇中咗搞手湯盈盈，身為湯盈盈男友嘅郭晉安梗係唔妥佢啦。同場有好多盛女都好出位，好似前港姐朱婉儀都賣晒大包，旁邊嘅王老五仲唔搏命𥄫咩。
同湯盈盈好熟，佢嘅熒幕初吻都係俾咗我，俾我𥄫吓冇所謂啦！
第7集龍婆發威
飾演郭晉安嫲嫲的羅蘭，應Bob及湯盈盈要求出租祖屋，等Bob可以搞「撞鬼旅行團」。為咗搞氣氛，湯盈盈仲做埋媒，扮俾「龍婆」羅蘭嚇親。
