有線娛樂台主播劉明軒，星期一（一月七日）同拍拖只有一年多啲，做金融嘅王傲山，响跑馬地聖瑪加利大堂舉行婚禮，加入派利是大軍。
同過恒生銀行創辦人家族成員何乃斌拍拖嘅劉明軒，曾經俾人踢爆佢同對方一齊幾個月已經逼婚，甚至要求男友將淺水灣千萬物業加埋佢名，結果分手收場，後來前度結埋婚，但劉明軒居然唔肯交番淺水灣物業業權出嚟，搞到雙方要打官司。做唔成恒生家族新抱，劉明軒繼續釣金龜，終於俾佢搵到王傲山，貫徹風格，打鐵趁熱，仲同記者講已經ready生仔，分秒必爭。
幸福要自己爭取，當年同阿Rain李彩華拍咗兩年幾拖，王傲山話飛你就飛你，响南加州大學讀財務學系嘅劉明軒，果然手急眼快得多。
新娘戴住三卡求婚戒指出嫁，王傲山自爆讀誓詞時忍唔住喊，反而老婆劉明軒冇激動，只係前一晚瞓唔着。
有Big Four到賀，親友個個爭取機會影合照，安仔更有婆婆fans。
同新郎哥分屬老友嘅Big Four，都有嚟觀禮，蘇永康同梁漢文仲幫手做兄弟
同劉明軒一齊响有線做過同事嘅鄭文，以及鄭中基太太余思敏，都有份做伴娘。
