淡出娛樂圈之後，陳文媛專心打理指甲生意，仲愈來愈省鏡。上個月29號，FBI喺銅鑼灣時代廣場見到BoBo，雖然冇做呢行，但BoBo對鏡頭仍然好敏感，一見FBI影佢就行快幾步入𨋢走人。
當日男友金紫耀冇同行，之前有傳佢同拍拖7年男友分手，FBI仲聽聞金生曾經帶過一個長髮少女返舊公司添。不過，上年年尾，FBI都發現放工時間，金紫耀都係坐住保母車專登去北角BoBo嘅美甲店，接BoBo收工再車佢返北角寶馬山嘅同居愛巢，順順利利踏入2013，希望BoBo今年有好消息啦！
唔做娛樂圈，BoBo都仲keep住靚樣，唔少途人都仲認得佢。BoBo仍未知幾時嫁入金家，但佢嘅舊愛Edison就同台灣新歡Ann成日晒恩愛，FBI仲聽聞Edison已經求咗婚。
金紫耀（小圖）接咗BoBo後，就同佢一齊坐保母車返寶馬山同居竇，雖然仲未嫁入豪門，但BoBo同男友多年來感情好好，而且金紫耀曾經講過︰「遲早都要結」，希望真係可以快啲啦！
