上個禮拜四晚（十二月二十七日）舉行嘅《新城勁爆頒獎禮2012》，一共頒咗163個獎，豬肉獎量再創新高。
既然人到有禮收獎多人不怪！八珍見到周國賢跛住都要撐柺杖上台，證明太公呢嚿豬肉，真係有人恨食。
禮尚往來，現場一眾歌手，無論你講唔講得出佢哋個名，個個都悉心打扮嚟見「太公」。不過唔知係潮流風格，抑或歌手本身品味跌watt，驚嚇例子一籮，包括五呎差兩吋嘅糖妹，著咗條無六呎高都襯唔起嘅鬆糕裙；斷估起碼翻脹二十磅嘅欣宜，件衫擺明唔啱size，仲要加條七彩傘裙加黑leggings以為遮得住下半身，可惜，唔得。
全場最得人驚係王菀之，化到成隻眼紅色，有網友笑佢似《吸血新世紀》，又話佢條黑裙似睡衣。其實似乜都好，八珍都係嗰句：呢個世界上，王菲，真係得一個㗎咋！
殭屍小姐：紅眼影加黑裙，王菀之仲要扮cool唔笑，加埋把長髮，撞鬼！
高攀唔起：著咗高踭鞋，糖妹身高勉強可以去到五呎二，不過點都冇四十四吋長腿，何必著呢條令你更加矮嘅鬆糕裙？
全晚，唯一一條超過三吋長事業線，居然响翻脹欣宜身上搵到，睇埋佢個下半身，快啲搵張玉珊啦！
火舞風雲
阿G.E.M.同嘉欣BB一身打扮，直頭回歸八十年代經典電影、為入獄老豆病危阿媽夜總會賣身嘅《火舞風雲》。
誓死效忠
個頭有三塊葉嘅Eason出場唱歌，觀眾已經走咗一半，身為Adidas代言人，一身品牌服裝上台做唔到應有收視，去到慶功宴，Eason換過另一套衫，著埋全球限量100對嘅JEREMY SCOTT SPECIAL EDITION，再戙高埋隻腳俾人影，識做到呢！
