亞視主要投資者王征上周五突出席新開辦的「演藝訓練計劃」，發現出席率低而怒炒拒上洗腦式訓練班的四位藝人，幾位當事人昨以短訊回覆不再回應，但已有人向香港電視專業人員協會求助，而當日有份上堂的亢帥克昨日自爆，自己只是好運才無厘頭獲嘉許加人工。
亞視早前開辦洗腦式演藝訓練計劃，上周五因王征現身發現戚黛黛、張啟樂、車車（張紫櫻）及陳綺雯等無故缺席，即時怒炒，惹來歐錦棠、陳煒及張文慈等亞視前藝人鬧爆，歐錦棠批評亞視「征盡台亡」。四位被炒藝員昨以短訊回覆不再回應，但香港電視專業人員協會會長徐小明承認有人向協會求助：「有藝員聯絡咗副會長肥媽瑪利亞，我哋會提供法律協助同介紹工作。」
「老闆發火冇聲出」
當日有份上堂的亞洲之子亢帥克昨返亞視大埔總台為《我要上ATV春晚》節目錄影，節目原由戚黛黛、張啟樂任司儀，昨改由筱靖、蔡梓銘頂上。任評判的亢帥克透露因出席洗腦班獲加人工，他直言：「係呀！我好乖，我聽話唔違背公司規矩。」談到炒人情況，亢帥克老實說：「有四個同事被炒大家都唔開心，我哋有即場求情，但嗰日老闆脾氣唔係幾好，好決絕。」他透露當日有八至十人上堂，點名時有幾人因早到獲加人工，他是其中一人：「其實我只係上過星期五一堂，之前因為有屋企人大壽請咗幾日假，嗰日晏啲要拍嘢又早咗起身，咪去上堂囉。」對於王征鬧高層做得不好，他坦言：「老闆發火冇得出聲啦！」
亢帥克坦言眾人曾替被炒藝員向老闆求情，但老闆脾氣差未受理。
【今日我至擦】筱靖同蔡梓銘臨時頂替被炒嘅戚黛黛、張啟樂做節目主持，筱靖發功勁擦亞視同老闆鞋，真係搵食艱難。
魏秋樺被問到亞視自居良心電視台卻炒人時，表現口窒窒。
筱靖擦鞋撐亞視
筱靖則裝儍謂不知頂替戚黛黛做司儀，但卻揚言曾致電慰問對方，當日筱靖亦有上堂，並大擦公司及王征鞋：「公司有培訓機會，同事應該支持，諗唔到點解要反對，藝人應該有藝德同紀律。」說到課程洗腦，筱靖再發功：「唔係喎，嗰堂王生唔係只插人哋，都有話自己報錯新聞唔好，我收7,000蚊人工，收幾萬人工嗰啲應該尊重公司！我咁嘅人工冇必要撐公司，以前仲俾亞視炒過㗎！」
而亞視會會長魏秋樺被問到亞視以良心電視台自居卻炒人時，口窒窒說：「要了解先，或者唔止冇返一、兩日。」又撐鬧高層衰過梁振英的王征直性子，出發點是為亞視好。
From:
http://hk.apple.nextmedia ... 121224/18111792
