31歲鍾欣桐阿嬌早前被揭食泡菜，與韓國俊男K先生拍拖半年。
雖然阿嬌希望保持低調，不過戀情啱啱開始，梗係無時無刻都想同男朋友仔一齊。本周一（10日），阿嬌出席上海《2012華鼎獎中國百強電視劇頒獎典禮》，當晚佢單拖現身，但實則呢，原來有仔相伴。周二（11日）頒獎禮翌日，K先生被目睹喺上海浦東機場準備返港，過咗大約5分鐘，阿嬌竟於同一地點出現。你哋話嘞，世事邊有咁蹺？何況兩個都黑超黑羽絨情侶裝，鬼咁明顯。想逃出媽咪姐法眼，難呀！
阿嬌其後施施然同助手推住行李車入機場。阿嬌戴黑超着黑羽絨，同男友好襯。右手無名指更戴住訂情戒指，sweet到不得了。
咁都俾你發現到㖭！K先生當日先到上海浦東機場，佢check in後，百無聊賴㩒電話（右圖），唔知係咪send緊短訊俾阿嬌呢？
周一（10日），阿嬌出席華鼎頒獎禮，當晚佢憑《武則天秘史》贏得中國古裝題材電視劇最佳女演員獎。
