周三（13日）英皇舉行春茗，全場焦點落晒喺阿嬌（鍾欣桐）……個韓國男友K先生身上！繼周一（11日）喺首爾首次公開陪男友出席《義勇群英：毒蛇反擊戰》首映後，阿嬌終於帶佢去公司春茗，見吓香港傳媒。
不過，阿嬌先孖住阿Sa（蔡卓妍）出現，身為娛樂公司經理人嘅K先生就同一班韓國藝人喺稍後現身，之後極速閃入會場，大家爭住影佢，好哄動呀！後尾記者問番阿嬌關於K先生嘅嘢，佢只透露男友未來會幫英皇藝人傾韓國同美國嗰邊嘅經理人約，但就全程笑唔停。係嘅，成晚啲攝影機就對住阿嬌係咁閃，連一姐容祖兒都要行埋一邊，你話點會唔happy？
阿嬌喺台上明顯有啲尷尬，特登扶一扶旁邊嘅韓國女星，唔多望男友。
周一（11日）晚，阿嬌繑住男友K先生喺首爾行紅地氈，喺1度天氣着短袖短裙，愛嘅魔力真神奇！
