特首梁振英僭建醜聞浪接浪，民望插水。周日（9日），佢首度以特首身份，去沙田馬場擔任國際賽事嘅嘉賓，被馬迷噓爆！但郭富城一出場，全場𠵱嘩鬼叫，氣氛好極端啫！
下晝12點幾，郭富城以名錶代言人身份出動，氣勢強勁，身邊有大堆保安傍住，加埋馬迷有成半百人圍實，誇張到暈。見馬迷咁熱情，佢好鬼風騷，不停揮手。相隔10分鐘，梁振英到場，噓聲四起，之後落沙圈主持開幕儀式嗰陣，仲有馬迷大叫「吔蕉」，佢即時黑面。提到特首被噓，郭富城話︰「我聽唔到，我都被半喝倒采，因為我隻馬落敗。其實呢啲都係鼓勵嘅歡呼，我喺台上都係從歡呼聲同喝倒采中成長。」城城，媽咪姐知你好想幫口，但有啲嘢呢，係幫唔落㗎！
郭富城由十幾個工作人員傍實到場，加埋馬迷同記者成半百人，好誇張喎！
燥底生瘡
連日出席活動嘅郭富城，成日咪咪嘴，原來嘴角生咗瘡，真係要降吓火至得喇！使唔使搵熊黛林呀？
特首梁振英主持開幕儀式嗰陣，馬迷噓爆，不過佢繼續黑住面揮手。係呀，馬迷係好直接㗎！
奧斯卡影后琦溫絲莉真胸上陣，前面凸點，後面透視。佢上台頒獎嗰陣，連特首都被吸引𥄫多兩眼，如果對民生問題都咁着緊就good啦！
