甫開場，着住白衫兼超緊白褲嘅BIGBANG，從太空艙彈出來大唱勁歌〈Tonight〉，仲有噴火助興，擺明一開場已益觀眾。
韓國勁爆男子組合BIGBANG，上週六（8日）空降香港亞洲博覽館舉行一連三場演唱會，三場門券一早賣清光，有粉絲更為霸靚位，不惜瞓街排足幾日通宵。為答謝港迷，5子rap得high，跳得仲high，大隻太陽爆衫贈興，靚仔勝利更用廣東話冧港女，全場癲晒。
不過出名貪玩的BIGBANG，來港期間除開騷外，唔只shopping唔見影，更絕迹夜場。本刊收到風，原來5子來港前已收到戒色禁夜蒲令，谷埋谷埋，演出期間唱主音的太陽，惟有自揸發洩。
3日吸半億
票價最平由$480至最貴$1,680的BIGBANG騷，3場總計約35,400張門票一早賣清光。而據知每場銷售利益高達$1,800萬，連唱3場，總共吸走$5,400萬港幣，果然係壓軸最強。
太陽自揸
左起：T.O.P，大成，太陽，G-Dragon，勝利
身為主音嘅太陽最搏命，當晚solo唱〈Wedding〉時，即場表演爆衫玩自揸褲「浪」不特止，之後仲打後空翻（小圖）騷quali，全場至搏至high係佢。
T.O.P激凸
BIGBANG最靚仔rapper T.O.P，演唱會首晚都有着窄身褲表演Beatbox，下身超激凸。雖然T.O.P全晚cool爆甚少講嘢，但亦忽然在台上爆一句：「You guys are amazing.I love you Hong Kong.」全場粉絲冧爆。
《BIGBANG ALIVE TOUR 2012》由今年頭開始，於16國家、25城市舉行世界巡迴演唱，上週唱到來香港。香港是眾多城市中唯一能令BIGBANG連唱三場的城市，5子亦落力演出答謝港迷。
即場撕背心
首晚演唱會，8成女觀眾熱捧，其間當然唔少得5子又rap又唱飲歌〈Fantastic Baby〉、〈Tonight〉及〈Bad Boy〉等high到全場跟住一齊跳。
去到間場時間，5子又用超流利英文同fans傾偈，尤其隊長G-Dragon更即興用英文rap番佢喺《Mnet Asian Music Awards》（MAMA）開場白，現場觀眾個個拍爛手掌。至於最精采當然係大隻主音太陽，全場natural high由頭跳到尾，演唱會後半部更即場撕爛背心表演爆衫兼露出底褲邊，全場尖叫。
禁女入後台
演出時搏到盡，但向來出名鍾意買名牌兼愛蒲的BIGBANG，由上週五（7日）到港至週一，完全唔見有精采娛樂，莫講去夜場溝女，連行街shopping都冇被發現。
據知BIGBANG的經理人公司YG Entertainment，為免5子演出分心，除下令禁止夜蒲外，更嚴禁他們在香港的女性朋友到後台探班。原本於週日（9日），5子打算到位於西九圓方的Glasstique眼鏡店選購眼鏡，怎料行蹤外洩，其經理人事前曾派職員到場視察環境，見現場超過200名粉絲聚集場面極度混亂後，即臨時喝停5子的shopping活動，聽晒公司話。
上週六晚，追開台灣偶像嘅賭王千金何超蓮亦有去捧場，佢表示之前曾去韓國睇BIGBANG演出，佢話欣賞T.O.P最靚仔，GD最有才華。
放大圖片
同樣發生於9月，勝利被日本《Friday》報道，話有性伴爆佢做愛時鍾意鍊住對方條頸，見到對方露出痛苦表情就特別興奮嘅性癖好，而且刊登埋床照。雖然負面新聞一籮籮，但由於BIGBANG並非走純偶像路線，百毒不侵。
緋聞女冇得見
上週六（8日），BIGBANG首場港騷開鑼，隊員勝利緋聞女友、日模久保杏奈（小圖）亦唔怕避忌，同好友葉梁美蘭（左一）一齊捧場，可惜冇得入後台探班。
今年9月，勝利來港拍日劇《金田一少年事件簿》期間，曾同日模久保杏奈到灣仔唱K，據知杏奈當晚飲多兩杯，唱完K截的士時，主動攬住勝利啜面，表現熱情。之後勝利所屬YG Entertainment即澄清2人並非戀人關係。
4大高潮
BIGBANG 5子唔係齋rap齋唱，長達2個半小時嘅港騷，更有飛天、噴火演出助興。而最搞笑嘅勝利更不時講廣東話冧觀眾，算交足功課。
勝利跳馬舞
首晚演唱會尾段勝利唔只跳PSY招牌馬舞引觀眾注意，仲成日用廣東話讚fans：「好好！開心嗎？」之後又話自己鍾意成龍同李小龍，仲即場表演功夫、扮功夫熊貓，笑爆全場。
大成扮天使
大成solo演唱〈Wings〉時，就加埋對翼扮天使，之後仲被吊上半空，全場「O」嘴。
T.O.P踩名牌車
T.O.P就踩住喺美國極為流行嘅兩輪電動車（Segway Scooter）喺台上巡遊，而車身仲包住手袋名牌MGM嘅真皮，玩都玩得潮過人。
GD跳到着火
G-Dragon獨唱新歌〈Crayon〉時，台上即噴火助興，勁有氣勢。而一向愛染髮嘅GD被問到成日染髮會否驚甩頭髮時，佢仲話：「希望以唔同形象出現，未擔心過脫髮。」
