上個禮拜三晚（十一月二十八日），無綫响酒店舉行「長期服務暨傑出員工榮譽大獎頒獎典禮」，當晚大熱視帝黎耀祥、胡定欣，獲公司頒發「十年服務獎金牌」，老戲骨劉江更獲「三十年服務獎金牌」。
人生冇幾多個十年，黎耀祥明示希望繼續攞到二十年、三十年金牌，即係話無論政府發唔發新電視牌，祥仔都會效忠TVB，兜個大圈擦公司鞋。
同樣攞到十年牌嘅胡定欣，比祥仔更積極，露背加透視裙已經夠搶鏡，不過更搶鏡係佢離遠見到樂大媽，唔理對方其實同祥仔傾緊偈，趁機攝埋去貼近高層，之後胡定欣仲同記者講：「過去十年算好豐收，希望之後頒獎禮，可以憑《拳王》攞到最佳女配角啦！」恨獎恨出口，又識mark實樂大媽，孺子可教也。
大媽，睇住我呀！樂易玲原本同祥仔傾得好好地，胡定欣有理冇理，攝埋去打完招呼再合照，醒！
做忠做奸都得嘅劉江，從行政主席梁乃鵬手上接過「三十年服務獎金牌」，更透露剛剛同公司續約，有得加人工，至於同樣攞三十年金牌嘅周星馳，則未有現身領獎。著露背透視裙上台攞「十年服務獎金牌」，之後胡定欣落到台再捉實另一高層曾勵珍合照，鞋油唔怕多。
