11月娛樂圈喜事重重，繼早前霍啟剛郭晶晶結束愛情長跑、盈盈樂樂「奉女成婚」，杜德偉、李璨琛都做老襯。上周五（23日）莊思敏大馬拿督父親趁好日子娶新抱，排場勁不在講，出席賓客更是多不勝數。
一對新人在馬來西亞舉行婚禮，除了莊氏孖女莊思明與莊思華帶埋男友出席外，沈卓盈亦拖住拍拖兩個多月的金融闊少麥偉汶（Raymond），在席上形影不離。
搶贏楊秀惠男友，沈卓盈一於箝實筍盤，公告全世界自己已經坐正。
我要揀最好嘅！（真實對白）
佢哋啲嘢唔關我事！（真實對白）
黐影大合照
大馬拿督莊寶娶新抱，莊思明同莊思華呢對孖妹都帶埋另一半出席，只有大家姐莊思敏形單隻影。沈卓盈都成功攝到位同主人家影大合照，唔知仲以為佢哋係一家人。
左起：Raymond Mak，沈卓盈，拿督夫人，拿督莊寶，新娘子，新郎莊順勝，大家姐莊思敏，細孖莊思明，細孖男友Daniel，大孖莊思華，大孖男友告東尼之子Sean
攬實男友
男朋友去飲帶埋自己梗係威威啦，沈卓盈仲唔黐到實以示主權咩？女朋友咁嗲，Raymond都好受落。
莊思敏胞弟、拿督之子莊順勝於上周五（23日）在老家馬來西亞筵開五十席舉行婚宴，除了大馬皇室賞面出席，就連當地政商名人、藝人都前往祝賀。「莊家三姊妹」莊思敏、莊思明與莊思華盛裝現身，一早在場內滿場飛招呼賓客。
宣示主權
沈卓盈與莊家本來大纜都扯唔埋，成為席上客的她亦略嫌突兀。據知情者表示：「因為沈卓盈男友Raymond同莊家好熟，又係莊思明契哥，請佢去飲好合理。但沈卓盈同莊氏姊妹本身唔熟，佢都係跟男友去咋！其實佢哋拍咗拖冇耐，Raymond去邊佢都跟到實㗎啦！」
原本跟機師男友Simon拍拖的沈卓盈，今年9月經好友徐淑敏的穿針引線下，認識當時楊秀惠的男友、金融闊少Raymond Mak，二人發展迅速，楊秀惠即時被飛。有指拍拖一個月，沈卓盈已搬入了男友市值逾億的禮頓山豪宅。雖然Raymond外形花弗，但沈卓盈自有一套箍仔心得，「佢知道Raymond唔想咁高調，所以平時唔會同記者主動提起男友，不過私底下嘅朋友聚會，佢就次次都要孖公仔出席。本來Raymond今次諗住自己一個去大馬飲，但沈卓盈出嗲功叫男朋友帶埋佢去，順便識埋Raymond嗰邊啲朋友。」
大馬拿督有頭有面，喜宴上賓客可謂川流不息，席間沈卓盈與男友形影不離，正印女友地位真係坐定粒六！除了齊齊與主人家影合照外，沈卓盈更行到邊都拖實男友，Raymond亦大方向朋友介紹沈卓盈，哄得女方心花怒放。沈卓盈咁進取，又已屆適婚年齡，看來遲早行逼婚呢一步。記者致電沈卓盈，對於上周五去大馬做跟得女友，她說：「係呀！我跟男友去，本身同一對新人唔太熟。（係咪認定Raymond係真命天子？）拍咗幾個月，睇定啲先啦！佢人品OK！結婚係一生一世，我要揀到最好。」
去年甜蜜逛超市
金融才俊Raymond，係名測量師之子，家族身家過億，絕對係城中筍盤。去年10月Raymond被拍到與舊愛楊秀惠齊齊行超市，當時兩人恩愛非常，達到談婚論嫁階段。
撞姊妹裙
由於新郎哥有30個兄弟，所以「莊氏三姊妹」都要做無間道充當姊妹。專登飛去大馬出席婚禮的港姐陳庭欣（右二）雖然只係座上客，但居然同班姊妹撞衫，果然同莊氏姊妹夠friend！
莊思明拖男友見家長
哥哥結婚擺酒，莊思明帶埋德越混血兒男友Daniel見家長，Daniel好識做執到正一正，希望俾個好印象拿督。
莊思敏榮升「大姑奶」
身為大家姐的莊思敏都有份飲茶，佢送咗對卡地亞腕錶俾細佬同弟婦。飲過呢杯新抱茶，莊思敏正式榮升做「大姑奶」！
過百萬婚宴
大馬拿督莊寶娶新抱當然隆重其事，莊家豪擲過百萬在當地的君悅酒店筵開50席，認真架勢！之後仲喺大馬最新最大的club搞after party狂歡，玩到大家都唔捨得走。
楊秀惠急劃清界線
輸家楊秀惠在電話中聽到前度與女友沈卓盈打得火熱，酸溜溜的不欲多說：「佢哋依家啲嘢關我咩事？唔關我事我唔想講！」語畢便急急掛線，似乎極力希望劃清界線。
野心花旦
28歲沈卓盈一向是機會主義者，02年加入無綫任主持及拍劇，09年憑《古靈精探B》飾演Icy姐姐一角為人熟悉。現已躋身無綫二線花旦的她，由於肯搏肯露，深受客戶歡迎，無綫亦非常器重她，台慶劇《名媛望族》及拍攝中的《衝上雲霄2》她都有份參與演出。事業上肯露肯搏，感情上亦相當進取。
去年沈卓盈與機師男友Simon打風都打唔甩，點知分手後火速與金融才俊Raymond撻着。
沈卓盈每次出席公開活動，定必性感打扮去到盡，仲不時同客戶social，咁識做，當然特別受男士歡迎。
