楊秀惠前年同屋企人擲過百萬，投資代理美容品牌生意，過嚇做老闆癮，美容生意起步冇耐，但原來楊秀惠最近又喺大坑開咗間甜品舖，主打食鉋冰同日式蛋糕。
日前記者見到楊秀惠喺舖頭入面打躉招呼客人，見佢幫手擔凳仔，又落手落腳用碗布抹枱，老闆娘事事親力親為。其間記者見有兩個後生女入舖頭幫襯買沙冰，當佢哋見到楊秀惠嗰陣，就嗌咗出嚟，仲主動拉住楊秀惠影合照。
惡補廚藝
記者事後喺舖頭同楊秀惠打招呼，佢大方承認開甜品舖：「其實自己一向鍾意食雪糕同蛋糕，咁啱我識嘅日式甜品師傅想擴張，所以咪同朋友夾份開呢間甜品舖。」楊秀惠坦言自己今次同三個朋友夾份，投資咗6位數字：「以前我都鍾意整嘢食，試過整聖誕大餐同情人節餐畀男友食，最鍾意就係整甜品，因為食完甜品個人都會開心啲！」不過，楊秀惠話𠵱家連廚藝都生疏埋，所以趁住今次開甜品舖，要惡補一嚇。
【粉絲捧場】
有粉絲幫襯時捕獲楊秀惠，立刻影相。
【交帶員工】
楊秀惠（右）親自交帶員工，非常認真。
楊秀惠（左）日前在Instagram貼相，曬好友莊思敏都有到甜品舖捧場！
楊秀惠早前與葉樹培傳出緋聞。資料圖片
問楊秀惠會唔會再搞其他生意，佢就笑笑口話：「其實我本身鍾意扮靚，所以都係主力做番美容生意！」
採訪、攝影：王梓嫚
from:
http://hk.apple.nextmedia ... 160412/19567082
