■個肚籮咁大嘅周家蔚（中），噚日應谷祖琳（右）邀請同何嘉莉等出席月曆揭幕禮。
之前陳慧琳、楊千嬅等一班龍媽同BB嘅月曆令讀者睇得開心，噚日搞手谷祖琳請嚟有份影嘅周家蔚、文頌嫻等去尖沙嘴出席月曆揭幕禮。大會又發咗啲拍攝花絮相，見到個個媽咪攬住自己個BB都笑得好開心。
懷孕7個半月嘅周家蔚自爆家140磅，為咗影月曆節食咗一個月，佢話最開心係檢查時醫生話佢有腰，原來醫生係話BB瘦咗，所以有腰，令家蔚有啲慚愧。另外，文頌嫻話影相時囡囡一路喊、係咁郁，佢着嗰件tube top幾乎被扯甩，不過為慈善，性感啲都冇所謂啦。
■楊思琦同囡囡楊卓穎玩到開心大笑，都比較少見。
■陳慧琳呢個小龍包囝囝咁鬼肥，難怪佢抱得有啲辛苦。
■谷祖琳抱住肥嘟嘟嘅囡囡劉心，梗係忍唔住要啜落去啦。
■大笑姑婆楊千嬅笑到停唔到口，但囝囝Torres竟然完全冇反應。
