周家蔚昨宣佈陀B仔4個月，箍實桃花旺盛的老公洪天明，肚凸凸的她仍貪靚著6吋高踭鞋，雙手摸肚流露一面幸福。
現年31歲的周家蔚昨日公佈又有喜，現懷孕4個月陀B仔的她3年抱兩，老公洪天明雖然男人四十，但婚後桃花未斷絕，連環被爆有索女主動黐埋身，家蔚出招擋老公桃花，開行火力密密造人，終於成功懷第二胎箍實老公，昨日肚凸凸出席活動宣示主權，天明為做愛妻號，矢言學老竇洪金寶拒女埋身。
於06年港姐奪得亞軍的周家蔚，與洪天明結婚兩年，兩人現育有1歲兒子洪大仁，家蔚婚後做賢妻良母，家庭大過天，相反洪天明卻桃花旺盛，不時有索女主動黐埋身。今年6月，先被內地模特兒杜顏嘉在社交網貼黐頭芒相，兩個月後，再被爆與露背女在澳門碼頭拉扯。在大台冇工開的家蔚解約不成，索性專心造人，出招趕絕老公桃花，昨日她到灣仔出席活動，雙手摸肚開心宣佈懷孕4個月，3年抱兩趕做第二任媽咪。
試偏方恨生女
之前已傳懷孕的家蔚，昨肚凸凸現身記者會，依然貪靚腳踏6吋高踭鞋，工作人員小心翼翼攙扶，家蔚在台上宣佈懷孕4個月陀B仔：「生仔都好，大仔嘅用品可以用得番。」記者恭喜她再度懷孕，家蔚開心說：「忍咗好耐，終於講得。」問第二胎是否計劃之中？家蔚坦言：「之前試咗好耐，特別去試就冇，唔特別試就有，一切順其自然好啲。」她又一面幸福說：「老公好開心，最初未知仔女好緊張，我哋兩個都想生女，仲幫女改埋名，老公又叫阿仔嗌BB做妹妹，自己都覺得好誇張，之後驗唐氏綜合症時，姑娘話係仔。之前我哋有試偏方，頭髮勾戒指喺肚上面轉，頭髮轉邊面就係生女，試曬所有偏方都係女，但原來係仔，惟有叫囝囝改口，但生仔都開心。」
粗身大勢的家蔚，上落台都有工作人員小心傍實，以策安全。
大肚家蔚昨出席活動，獲大會送贈一大籃禮物賀她再為人母。
盼天明多留港
問會否追女還心願？家蔚說：「要睇大仔返學之後湊唔湊得掂先，之前天明同細佬喺內地做嘢，兩兄弟都幾好，係我自己太鍾意女，囝囝都意識到有BB，有時會將玩具放喺側邊，食嘢又一齊。」問天明有甚麼獎勵？家蔚說：「唔需要，只要佢努力搵錢就得，多個細路負擔大，希望佢多啲時間喺香港。老爺（洪金寶）都好開心，佢想我生多幾個，我要睇自己有冇能力。」
粗身大勢仍著6吋高踭鞋，家蔚振振有詞說：「慣咗，不過今胎辛苦啲，自己都瘦咗3磅，反而瘦過之前未有BB，同埋嘔得好犀利，上次肥咗60磅，希望今次肥30磅。」生完會否復工？她說：「生完先算，要湊小朋友，希望佢哋開心成長。」
天明：減少應酬
記者致電天明恭喜，他說：「好開心，雖然大家想要個女，不過仔有仔好，老竇喺第一個孫未出世，已經叫我哋生多幾個，但我怕冇時間陪小朋友，我會同老婆研究係咪再追女。」問會否減少應酬陪老婆？他承諾說：「都要，唔止應酬，雖然香港市場越嚟越細，自己寧願內地減產搵少啲，其實大仔出世後，推咗好多內地戲，陪小朋友係金錢買唔到。」桃花旺盛的天明，會否杜絕多女埋身？他坦言：「自己小心啲，fans影相好難拒絕，澳門嗰次只係做完嘢送我去碼頭，雖然老婆信啫，惟有好似老竇咁，儘量唔同人影相。」
採訪、攝影：王連連
家蔚和天明已有1歲兒子洪大仁。資料圖片
家蔚恨生女，曾將囝囝打扮成女兒。微博圖片
from:
http://hk.apple.nextmedia ... 141116/18936470
