今年6月，劉浩龍幫城市電訊CTI拍《第二人生》，開鏡當日爆出「祖師戀」，師兄即時人氣急升，雖然個台仲未發牌，但眨吓眼套劇就煞科，仲搞埋慶功宴做宣傳。
當晚師兄當然又做咗焦點，FBI即刻問佢記唔記得開鏡嗰日就爆出佢同祖兒拍拖啦，點知師兄扮傻：「唔記得……角色名都唔記得喇。」對住FBI扮傻，但見到老闆就醒晒。師兄見到王維基行埋枱，師兄即識做拎走凳上面個女裝手袋，畀老闆坐個靚位。咁醒目，唔怪得氹掂天后啦。
影大合照時，師兄好識做咁拎開個手袋，等老闆王維基坐低！好招呼到呢！呢晚師兄簡直係大太監上身，見到趙學而一樣識得讓座。禮多人不怪，師兄最叻。
見到前輩黃文慧，師兄又好熱情攬攬，上次喺叱咤記招見到祖兒，又唔見你咁熱情嘅？
