劉浩龍（師兄）、張敬軒、周柏豪、關心妍、謝安琪、連詩雅等歌手，噚日喺港台出席「第三十八屆十大中文金曲頒獎禮」記者會，大會宣佈今年「名人堂」得主係林子祥，而「金針獎」得主係鍾鎮濤，仲會增設樂隊金、銀、銅3個獎項，另外請咗一位樂壇極具份量嘅巨肺歌手做開場演唱嘉賓。
師兄女友容祖兒雖然冇到，但佢同舊愛鄭融就好避忌，兩個人平排坐歌手席第二行，雖然中間隔咗幾個歌手，但全程零交流。講到祖兒缺席，師兄話：「近排好少見，我都係噚日先喺澳門返，因為賽車觸傷頸背舊患，返嚟即刻去咗睇脊醫。」
昔日恩愛
糖妹叫舊愛何浩文加油。
糖妹為Dominic解畫
另外，黃山怡（糖妹）舊愛何浩文（Dominic）新歡個樣有「翻版糖妹」之稱，唔知係咪對正版糖妹餘情未了，佢即澄清：「齊蔭女仔好多，完全唔關事，分開咗咁耐，大家都加油啦！」
至於陸永老婆捲入一單贓款案，陸永話老婆已經證明清白冇事，但戶口仲凍結緊，對生活就冇乜影響。佢仲講笑話：「不過仍然可以拎錢出嚟，我都係拎咗幾億。」
撰文：馮仁昭
馮仁昭
from:
http://hk.apple.nextmedia ... 151125/19386244
