【今日我至巨】陀住7個月巨肚嘅周家蔚繼續活躍，前日孖住天明去銅鑼灣超市買餸煮飯仔。DV圖片
【銅鑼灣】懷孕7個月嘅周家蔚預產期喺出年1月左右，所以呢排要買定BB嘢，前日下晝3點幾，腹大便便嘅家蔚孖住老公洪天明喺銅鑼灣行街買奶樽，由於街上人頭湧湧，天明怕家蔚俾人撞親，所以拖實老婆，家蔚亦不時用手護住個肚。
超市買餸佢哋先去崇光賣BB嘢嗰層揀奶樽同其他用品，但因為人太多，佢哋由門口行去搭扶手電梯都要行幾分鐘。前日撞啱崇光減價，所有貨品有折頭，天明同家蔚揀咗奶樽同唔少BB用品離開，由天明畀錢。買完奶樽，天明繼續拖家蔚行連卡佛，再去city'super買餸，其間家蔚又睇BB用品，見佢一邊睇一路打電話，隱約聽到佢問朋友價錢，似乎格緊價，但最後都只係買咗煮食用品同餸菜就走人。
