周日（11日）亞視老細王征同盛品儒，帶埋成班職員藝員同候選亞姐亞生去政府總部外，做咗場騎呢騷，話要用娛樂手法去表達反對政府發新免費電視牌照嘅訴求喎。老實講，媽咪姐覺得成班亞視員工為咗養妻活兒，連星期日都被徵召出嚟做人肉布景，已經甚慘！
但因乜解究亞視仲要將呢個歌膠舞爛嘅節目直播先？係呀，媽咪姐係一年都唔㩒去睇一次亞視，但呢個係公眾頻道喎，下次亞視會唔會直播埋王征壽宴、搵亞洲先生心口碎壽包㗎？好驚囉！難怪呢幾日，廣管局收到成2千宗投訴，仲有網民號召喺呢個月24號圍攻亞視。
「王征Style」犯眾憎，唔少前亞視人都鬧爆，就算依家仲做緊嘅，亦唔敢硬撐公司，甚至無話可說。唉，都係大姐明林建明講得好，「台之將亡，必有妖孽！」梁特首，我哋已經無$8,000啦（澳門特首派糖，每位澳門人有8千蚊），強烈要求多發幾個新免費電視牌照！香港人要有得揀！
周三（14日），網上流傳一個聲稱由王維基發俾城電員工嘅電郵，叫大家傳開去，希望以「一人一信（電郵）」方式，向梁特首同商務及經濟發展局局長蘇錦樑表達加快開放新免費電視牌照嘅訴求。媽咪姐撐硬呀！
林祖輝姚嘉妮：政府要做嘢！
「王維基話要開台，TVB即加人工，幕後可以跳槽，有競爭係好事。我好開心離開ATV，如果我仲喺ATV，一定會辭職。電視台係公眾機構，政府要做嘢，ATV依家犯規又多人投訴，已經無生存價值！」
歐錦棠：亞洲電視你衰夠未！
鎮台之寶無聲出
呢次王征做到咁肉酸，亞視唯一驕傲《百萬富翁》陳啓泰都唔敢幫口。而資深藝員肥仔賢亦有口難言，慘！
陳啟泰：我無乜好講。「無嘢講。我出席，係因為『亞洲會（亞視附屬組織）』叫我去。」
劉錫賢：你叫我點講呢？「我係『亞洲會』嘅人，所以我要嚟（集會）。（你點睇發多幾個牌呢？）你叫我點講呢……多個競爭多個選擇，大家都明。」
寃家亞姐唔同view
黎燕珊：「作為員工，明白公司嘅立場。如果亞視倒閉，有好多員工同家庭受影響。希望政府審慎處理發牌，再發3個免費電視牌照，好似太多嘞。」
羅霖：「連高層（王征）都參與跳舞就有啲激，可能高層習慣咗親力親為。我本身支持政府發牌，覺得多兩個電視台其實可以接受。」
網友力撐CTI
除咗王維基喺網上發功，有網友自發性改圖寸亞視節目《ATV焦點》，亦有不少人留言鬧爆亞視公器私用，又話想佢快啲執。媽咪姐呢，就好簡單啫。唔該俾番選擇嘅自由同權利我，快！
