周日（28日），剛為人妻嘅周汶錡（Kathy）去沙田馬場出席東方表行活動，一身性感晚裝示人，露胸、露腰又露背，仲搏過以前，成為全場焦點！問佢咁性感，有無俾老公過目，Kathy仲爆一句︰「乜都俾佢睇過晒啦！」心情靚爆。
周汶錡同班港姐合照完，一見諸葛紫岐埋身，即時變樣，十萬個不願意咁款！
不過當佢同「話題女王」諸葛紫岐合照嗰陣，即時變晒樣，唔係唔望對方，就嘴藐藐，擺明懶得交戲，搞到平日巴巴閉嘅諸葛紫岐鬼咁尷尬，全程以笑遮醜！Well，呢啲唔知算唔算一山還有一山「高」呢？
兩個人妻企埋，聲都唔聲，零視線交流，單睇身體語言，就知佢哋有幾「friend」。
早輪喺馬場起踭搶岑麗香鏡嘅諸葛紫岐，今次俾Kathy一個轉身搶晒位輸到一額汗。勝利者周汶錡當堂笑口噬噬，話晒做咗廿年model有多㗎，輸？No way！
