前晚一連12場《草蜢森巴大戰軟硬Fans演唱會》繼續喺紅館舉行第4場，陳奕迅（Eason）夫婦帶住囡囡康堤，仲有俞琤、張繼聰等都去捧場，而佢哋嘅牙骹戰，軟硬以573比565追成場數2比2平手。
前晚最精彩部份係喺演唱會Encore末段，草蜢軟硬五子着晒紅T恤短褲上台，又每人請一位女fans合照。
抄A&F男模當五子要求台上粉絲做出誇張表情時，林海峰（Jan）就嫌佢哋玩得唔夠癲，隨即要求大會熄燈。當現場燈光重新亮起時，五子竟然除晒上衫展示一身肌肉，抄足A&F男模，搞到全場尖叫不絕。
之後Eason入咗後台同佢哋影合照，佢好鬼馬咁搞蘇志威個乳頭，仲伸埋脷㖭，睇到傑仔眼定定，仲好似激凸㖭；Eason講笑話：「嘩，畀我有咁嘅身形就正，不過你哋好似5個救生員，戴返泳帽啦，阻水呀！」
