英皇主席楊受成細仔楊政龍前排同前華姐倪晨曦、苟芸慧開船P，FBI都以為楊政龍咁識食，專食選美靚女，但原來楊政龍嘅正印女友另有其人。
前週六（6日），FBI喺跑馬地撞到楊政龍同倪晨曦成班friend。當晚楊政龍揸住架約60萬嘅GT-R，泊咗喺街，成班人落晒車企街吹水，吹咗15分鐘，突然有個女仔喺GT-R落車，原來係秦沛嘅寶貝女，做過主持出過碟、最近同阿哥孖住過檔王維基CTI嘅姜麗文（Lesley）。當日見佢同楊政龍好鬼sweet，男方仲當街幫女友捏膊頭鬆骨，之後Lesley就上番男友架車走人。FBI之後打過電話畀Lesley阿哥姜文杰，問佢知唔知阿妹同楊政龍拍拖啦，佢話︰「唔知喎，我同阿妹呢排好少見面，我幫你問吓佢……。」睇嚟秦沛女真係大有機會做下一個億萬新抱。
當街揼骨：企街吹水期間，楊政龍忽然幫女友揼骨，其他朋友都好似見慣晒咁，真係好sweet。
好服侍：吹完水離開，楊政龍好有風度幫女友開車門，雖然兩人都冇俾途人認出，但架辣車GT-R就好揚囉
姜麗文、姜文杰老豆係老戲骨秦沛。2010年，原本喺日本NHK台做兒童節目主持嘅Lesley回港，孖住阿哥自資造獨立音樂，以Benji and Lesley組合闖樂壇。兩兄妹同老豆關係超好，不時上載全家福相上微博。網上圖片
同朋友吹吹吓水，楊政龍突然抱住朋友隻小狗企出馬路，嚇到成班friend𠵱嘩鬼叫。想嚇死隻狗咩？而倪晨曦就企喺路邊陪笑。
10月6號晚俾FBI撞到佢哋喺街吹水，原來當日日頭楊政龍就去咗開船P，當日船P姜麗文都喺船上，但刻意避開上鏡，只喺微博上載一張狗相，話同朋友出海。而呢隻狗仔，同楊政龍當晚喺街抱住嗰隻係一模一樣。
華姐煙幕
暑假期間楊政龍搞船P，倪晨曦、苟芸慧及韓模蔡恩真都喺船上面，但原來佢地都只係煙幕。
