有線經典靈異節目《怪談》長做長有，在上周六（13日）播出的全新一輯入面，其中一位來自大馬的陳法應師傅，是當地連皇室成員都要俾幾分薄面的著名解降師，最拿手解降與驅鬼。
冧莊做主持的阿夢岑寶兒，早前赴大馬拍外景，親眼目睹陳法應師傅街頭作法驅鬼。阿夢話師傅在很短時間內已成功招來亡魂，她當場亦見到白影出現。
向來驚青的阿夢，仲要師傅送作法肚兜定驚！
在新一輯《怪談》擔大旗的岑寶兒（阿夢），早前與攝製隊走訪馬來西亞越洋「惹鬼」，挑戰不少當地流傳已久的猛鬼勝地。由於是次越級挑戰了不少「惡鬼」，故節目監製特地透過香港有名的「警界天師」簡信回穿針引線，找到在大馬甚具名望的陳法應師傅參與是次拍攝。已年屆74歲的陳師傅在大馬除了專門幫人解降外，據講捉鬼治鬼亦有一手。
本來不懂馬拉話的女星Tiffany被女巫上身後，以純熟的馬拉話與師傅展開連番罵戰，其後被師傅唸經作法請她離開。
據知女巫莫娜生前法力非常高，死後寃魂不息，經常大鬧當地警局及監獄。節目中更播出莫娜的生前照片，的確令人心寒。
公路惹鬼上身
曾自稱被四鬼纏身的阿夢再度以身犯險，不過這次在陳法應師傅陪同下，她已放心不少。《怪談》大隊先到當地著名的交通黑點「關單公路」招魂，阿夢表示：「師傅招魂真係招得好快，招魂後我即見到有個白影出現！」由於寃魂上了司機身，導致汽車失控剷上壆，但陳師傅及時作法控制了場面，及後更給了阿夢一個定驚肚兜，紓緩其心緒不寧的情緒。
其後阿夢與大馬女藝人Tiffany再到荒廢很久的警局舊址，尋找怨氣十足的「女巫莫娜」。莫娜本是當地法力甚高的女巫，後因錯手殺死兩名徒弟而被判死刑，鬱鬱含寃的她生前堅持否認謀殺，故死後陰魂仍在死處徘徊。在陳師傅迅速招魂下，阿夢猶有餘悸的憶述：「個女巫上咗完全唔識講馬拉話嘅Tiffany身。上身後Tiffany好流利咁講咗好多馬拉話，師傅好惡咁同佢對話。當時個場面好震撼，我都覺得好驚，但師傅好淡定，感覺佢法力好高強。」
去年接手主持《怪談》的阿夢，因常接觸靈界而變得時運低。她曾表示有污糟嘢跟回家，仲圖文並茂記錄低被鬼圍的情況，要搵師傅幫她淨身才能收科。
以往經常在《怪談》親身上陣的梁思浩，呢輯已經冇得留低。而上輯喊晒口瞓洗屍牀的阿夢就繼續驚住去撞鬼。
唔收錢拍《怪談》
據知陳法應師傅今次乃不收分文協助《怪談》拍攝，於馬來西亞及泰國等地已有數千個徒子徒孫的他，為了積極在香港及內地發展，日前已於葵涌設置教壇。
頻頻來港打理教務的陳法應，日前接受本刊訪問時談及《怪談》的拍攝經歷，他說：「其實喺大馬關單公路嘅兩隻女鬼係俾人打劫後殺死、再燒屍，所以佢哋怨氣好重，我已經超度咗佢哋。至於警局內嘅女巫莫娜，我就幫唔到佢，因為佢唔肯相信我，最後佢都係陰魂不散留喺嗰度。」今次他在《怪談》中大騷捉鬼的看家本領，相信會令觀眾留下深刻印象。
保安扇
陳法應師傅日前於葵涌教壇接受本刊訪問。他手持拜師入門後均會獲贈的摺扇，指扇上印有十三道符，放於家中除了有保平安的作用外，閒時撥一撥亦有安神的效用。
皇室御用
陳法應師傅多年來為大馬皇室消災解困，因而獲頒皇室的「通行證」，能自由進出政府要地及邊境，一般官員亦不得向他查問，猶如獲得最高榮譽及地位的肯定。
經常見報
白蓮教第三代傳人及金英教第四代傳人的陳法應於大馬傳教近五十年，其解降及驅鬼事跡更多次被當地報章大肆報道。
梁佩瑚睇樓撞女鬼
鬼神呢家嘢信不信由你，梁佩瑚就曾在香港睇樓有撞鬼經歷。早年梁佩瑚在玄學家吳佩孚陪同下去天后睇樓，她憶述當時情況，「嗰度係一幢戰前舊樓，都係得鐵閘冇門，每上一層都望到出面走廊。我要睇嘅單位千幾呎，裝修完都幾光猛，但師傅去完廁所就話走得，唔使再睇。離開後佢先話我知搭時喺一樓至三樓走廊，都見到同一隻着紅色旗袍嘅女鬼望住我哋。入到間屋嘅廁所，師傅喺塊鏡嘅反映見到着小鳳仙裝嘅女鬼望住佢，真係非常恐怖。經紀話間屋本來租俾個鬼佬，但佢住住吓突然搬走，丟空咗年幾。」
好明顯梁佩瑚睇嘅係凶宅，如果真係要住，陳法應師傅話入住前要在四角放粗鹽及白米，有驅鬼作用。又或者請法師上門燒符做法事驅鬼，若未能成功，就要作法收伏對方。
