𡃁模嘅特色不離以下幾點：用英文名（因為無人記得佢哋嘅中文名）、肯剝、寸嘴、為咗見報唔介意公開私人嘢！周日（14日）Jeana喺銅鑼灣出席化妝學校活動時，就向大家示範點樣做一個恰如其分嘅𡃁模。
好似Jeana深知自己同張柏文嘅戀情，係傳媒近來對佢唯一關心嘅議題，於是有備而來，戴定隻閃爆鑽戒到場。佢揸咪接受訪問期間，仲有意無意托吓隻戒指，引到現場記者chok吓佢呢隻戒指嘅來歷。Jeana奇招得逞，亦識做話：「隻鑽石戒指係因為大家好耐冇見，佢送俾我嘅安慰獎。」
將女人趨之若鶩嘅鑽戒降呢做「安慰獎」，噏得出呢類脫離現實嘅嘢，Jeana真係冇入錯𡃁模呢行囉！
人揸咪你揸咪，Jeana就不停起勢托吓隻戒指，散發一下啲鑽光。
同場嘅松岡李那都係白衫襯牛仔熱褲上陣，難怪Jeana點都要着住件黑色外套啦，皆因𡃁模守則之一：撞衫都要搵差唔多level嘅對手嚟撞吖嘛！
