近年，商台DJ森美（原名梁志健）踩入無綫做主持，與阮小儀主持的《千奇百趣》系列長做長有，早前還處男下海拍劇集《法網狙擊》。
隨住幕前演出愈接愈多，森美的五官亦產生變化。據知他三年來幫襯西貢的張可蔭醫生打Botox及透明質酸，用作瘦面隆鼻樑及縮鼻翼。本刊記者向張醫生提及森美是其客仔，他亦承認：「係呀，佢係我中學同學。」森美卻死撐指：「張可蔭係我醫生，我去睇專注力失調啫！」但他拿着自己03年的舊照，亦不得不承認自己個樣「變咗好多」。
現年38歲的森美，94年參加商台「叱咤殺戮新大陸比賽」入行做DJ。早年，他扁鼻加面闊如大福餅，但近年愈撈愈受歡迎，還跳出商台為無綫主持多個節目，他的面形亦隨之而改變。最近，他主持《千奇百趣東南亞》時，昔日圓面變尖，鼻樑亦顯得異常高企，望落與林峯絕對有得揮，難怪他在節目中不時沾沾自喜讚自己靚仔。
03年闊面鼻短
03年，還未修身，體重高達180磅，pizza面加短鼻，面部皮膚亦鬆弛，輪廓並不突出。
07年四方果
07年，減肥初見成效，身形變瘦，開始有星味，人氣亦急增。可惜他瘦身不瘦面，國字面依然明顯。
10年面形改善
09年開始打Botox瘦面，國字面有所轉變，面部肌肉拉緊，鼻形開始突出。
隔閘回應
本周二（2日），森美在商台做完直播後，離開時接受本刊記者訪問。他隔着鐵閘翻閱自己多年來的照片，承認自己的鼻形時高時低，面形亦有好大轉變。
瘦面變靚上鏡
自詡靚仔的他三年前開始幫襯在西貢執業的張可蔭醫生。知情人士透露：「森美本身好貪靚，成日嫌自己面闊，鼻形唔夠出，加上近年頻頻主持節目，梗係想以最佳形象示人。佢同張醫生好熟，醫生唔贊成佢開刀，建議佢打Botox瘦面同收鼻翼，以透明質酸谷脹啲鼻樑，睇起嚟高啲。」據知森美依照醫生建議，每半年補打一次針。
張醫生自爆森美係舊同學
在最近播出的節目《千奇百趣東南亞》中，森美的外觀望落更輪廓分明，擁有典型靚仔的高鼻及尖面。
日前記者以顧客身份到張可蔭醫生的診所，與張醫生面談約半小時，其間他除講解打Botox及透明質酸的程序，亦露口風爆森美幫襯過他。
現場所見，顧客多為30多歲的中年女性，診所亦貼滿不少介紹Botox及醫學美容的海報。等了約15分鐘，記者入房見張醫生，表示有興趣打Botox瘦面及以透明質酸隆鼻，其間張醫生直認森美是其客仔，更自爆兩人是老同學。
張：張醫生記：記者
記：打透明質酸要幾多錢？
張：大約4千一支，一次可以維持半年。
記：我聽森美講冇咁貴喎，點解佢平啲？
張：我同佢打梗係平啲啦，佢係我中學同學。
記：佢（森美）試過Botox瘦面同打鼻都OK喎？
張：係。
記：聽佢（森美）講都做咗好耐，都睇咗你幾年。
張：係呀。
美容針價錢大眾化
森美幫襯的張可蔭醫生，除為病人睇普通科外，亦有醫學美容服務，包括為客人打Botox、透明質酸、果酸換膚等服務。據知森美做的Botox瘦面及用透明質酸隆鼻，每次收費約3千及4千。當日記者只是查詢有關美容針的過程及療效，沒有進行任何療程，亦需繳付200元診金。
打Botox（肉毒桿菌）瘦面原理在兩邊面頰打入Botox，肉毒桿菌提煉出的蛋白質，可有效阻隔神經傳遞訊息，令發達的咀嚼肌收縮，亦可拉緊鬆弛的面部，從而達至瘦臉效果。注射過程只需5分鐘，打一次亦可維持半年至9個月左右。
而用透明質酸隆鼻，是將啫喱狀的透明質酸直接打入鼻樑，令肌膚表面恢復飽滿狀態，注射過程約10分鐘，打一次可維持半年至9個月。據張醫生表示，不少貪靚客人每隔3至4個月都會打Botox一次，確保瘦面效果持久。
同森美打會收平啲！
張可蔭的診所位於西貢福民路，鄰近西貢碼頭，人流不算太多，不過收費合理，吸引不少貪靚一族幫襯。
在張可蔭醫生的診所外標明，服務範疇包括為客人果酸護膚、透明質酸注射及肉毒桿菌注射（Botox）。
診所外亦貼有陳秀珠做嘜頭介紹打Botox的宣傳海報。
森美：張可蔭係我醫生！
本周二（2日）本刊記者到商台訪問森美，他看過自己多年的照片前後對照後，都直認變化很大，卻否認有整容。
森：森美記：記者
記：你最近好似靚仔咗好多喎？係咪打過Botox？
森：做過都係靚得咁少就唔抵啦，不過嗰時真係肥得好緊要。
記：點解個鼻高咗？
森：（邊睇最近的照片邊說）個鼻你哋都講咗好多年，但我真係冇整過個鼻喎，有啲相仲高㗎！呢張唔算高啦。
記：咁點解塊面瘦咗咁多？
森：Keep fit囉！呢個真係冇呃你，我之前去健身，個胸大咗，皮膚亦拉緊咗。
記：我哋知你睇開張可蔭醫生。
森：……張可蔭係我同學嚟㗎，亦係我醫生，我有睇呀！
記：搵佢打過Botox同透明質酸？
森：梗係冇啦，中學同學嚟咋，我有啲唔舒服，攞藥都搵佢。
記：佢話你有整過容喎。
森：梗係冇可能，佢係一個醫生唔可以將病人私隱洩漏出去。你唔使用呢個方法chok我。
記：你搵佢睇咩病？
森：…我…本身有專注力失調，我要長期食藥。
記：你知唔知張醫生有幫人打Botox？
森：知，佢有幫人整容。我定時搵佢，佢算係我半個家庭醫生。
記：有冇介紹佢俾你啲女同事？
森：我有叫阮小儀快啲去打Botox，佢梗係冇理我啦。我都覺得自己變咗好多，以前180磅，依家150磅。
森美堅稱瘦咗導致個樣唔同晒，解釋都幾牽強。做完訪問，他隨即跳上阮小儀的Audi房車一同離開，明顯逃避記者追問。
阮小儀有口德
本周二（2日），本刊記者訪問森美時，阮小儀在其身後經過時一度取笑他「你整容呀？」不過當阮小儀揸車離開時，卻未有為森美變臉一事停下做訪問，口下留情。
阮小儀傳出整容後，曾上黃柏高的節目澄清。當日陪她上節目的森美，更搞笑地摸她的下巴比較，但估不到森美才是打Botox瘦面的人辦。
去年指證阮小儀
去年記者拿出懷疑阮小儀整容的照片給森美看，他當時笑指：「阮小儀係靚咗，應該係執靚咗，好明顯塊面瘦咗，腮骨削咗，鼻樑高咗同割雙眼皮。」
豬籠入水
近年不少小生、花旦愈變愈靚，森美為無綫主持節目後亦被「同化」，而變靚後的森美，在無綫的工作亦大量增加。據知其無綫騷價更由每個6千升到8千元。由2009年起計，他在無綫的總收入近200萬元。以上收入還未計其DJ月薪、在外密密接的司儀工作及公開的商業活動。保守估計在這3年間，森美的總收入肯定超過1千萬。
節目
《超級巨聲》（4集×6千）$24,000
《打出十人巷》（10集×6千）$60,000
《千奇百趣》（19集×6千）$114,000
《千奇百趣香港地》（29集×8千）$232,000
《超級巨聲2》（15集×8千）$120,000
《千奇百趣Summer Fun》（30集×8千）$240,000
《千奇百趣Winter Fun》（19集×8千）$152,000
《魔法擂台》（13集×8千）$104,000
《千奇百趣省港澳》（30集×8千）$240,000
《千奇百趣高B班》（14集×8千）$112,000
《千奇百趣東南亞》（35集×8千）$280,000
劇集
《法網狙擊》（25集×8千）$200,000
無綫總收入：$1,878,000
