早年因為過分減肥而患上厭食症，試過瘦剩棚骨得番77磅嘅袁潔瑩（Fanny），自從與富貴同性密友阮嘉欣行埋後，狀態回勇。近年佢索性淡出娛圈，開中醫美容院，做番一個正常OL㖭！
早前媽咪姐喺西環撞到Fanny買餸，當日佢一身橙衫撞橙襪嘅打扮現身街市。雖然Fanny打扮騎呢，但起碼精神唔錯，冇100磅都有95磅，叫做正常啲㗎喇！唔好睇佢奀挑鬼命，其實佢好鬼抽得，雖然左右膊頭分別孭住環保袋，兼左手抽住5盒紙巾，但佢沿途講電話時依然中氣十足，七情上面，成隻河東獅吼咁款！媽咪姐都要寫個服字俾佢。
金牛買鵝
Fanny第一站幫襯冰鮮鵝，但買嗰百零蚊嘢，就要出動金牛，可想而知金牛對佢嚟講，只係買餸嘅散紙。
豪氣劏豬
第二站，Fanny走去肉檔揀新鮮豬肉。買完後，佢仲好大聲同老闆講：「唔該晒，老闆！」認真豪氣
隨街泊車
買完餸，Fanny將戰利品放番佢架寶馬度。當日Fanny隨街泊車都冇被抄牌，好彩！
