藝人講股：袁潔瑩買實力股唔驚輸清
袁潔瑩喺97年金融風暴輸咗超過200萬，呢次教訓令佢日後喺買股票時會更小心，所以今年當恆指去到3萬點時，佢就將手頭上嘅中國人壽（2628）、中國移動（941）同香港交易所（388）喺最高價時全部放晒，但賺番嚟嘅錢，就仲未可以彌補番佢97年嘅損失。陸菲特噚日同袁潔瑩傾開電話，問佢呢輪有冇再入市，佢話：「我好後悔上個月匯豐（005）有日跌到75蚊時冇買入，呢啲機會好難逢，而家個市一日升一日跌咁，真係好難玩，今日又跌咗千點，但好多股票嘅價值仲未達到我心水，等再跌吓，我會再買入中人壽、中移動同匯豐，經過以前買毫子股嘅教訓，我都係買番啲實力股，就算個市點跌都好，只要唔等錢使，等佢慢慢升番上去，始終唔會輸呀！如果買毫子股，個市一冧，真係連渣都冇埋。」撰文：陸菲特
