【今日我至飽】
劉倩婷同男友李丞責唔只有情飲水飽，前晚佢哋糖黐豆開餐，食飽飽後仲十指緊扣離開，唔知佢哋會唔會飽得滯呢？
【銅鑼灣開平道】
現年26歲嘅劉倩婷出年同46歲堪輿學家李丞責結婚，佢哋拍拖以嚟都相當煙韌，好似前晚7點左右，記者又見佢哋孖住出巡，去咗銅鑼灣開平道嘅意大利餐廳da Domenico食晚飯。佢哋一齊入去餐廳後，唔知係咪冇位關係，李丞責又突然走番出嚟，但佢一行出餐廳冇耐，劉倩婷就即刻行出門口叫番佢入去餐廳，原來已經有位。
李丞責前晚同劉倩婷去銅鑼灣意大利餐廳撐枱腳。
食飯期間劉倩婷頻頻玩手機。
一身便服打扮嘅李丞責同劉倩婷擦咗唔夠兩粒鐘就離開。
各自玩手機劉倩婷同李丞責被安排坐喺門口位置，兩個人點完菜後，就自各玩手提電話。由於餐廳冷氣太凍，劉倩婷都要加番件披肩。撐枱腳期間，李倩婷同李丞責有傾有講，佢哋擦到大約8點45分就食飽飽離開，由李丞責負責埋單。佢哋一早叫咗司機揸部「OXO」靚車牌嘅Range Rover嚟接佢哋，劉倩婷一行出門口仲即刻主動拖實李丞責，好明顯對呢個準夫婿好緊張。
