被指借醉咀吳卓羲嘅Toby，噚日同老公黃敏豪十指緊扣闢謠。
苗僑偉（三哥）、林峯、徐子珊、樊亦敏同官恩娜（Ella）主演嘅無綫新劇《雷霆掃毒》下周一播映，噚日分組喺西灣河進行競技遊戲扯大纜同空中拍球，三哥仲同黃智賢喺空中游繩拉橫額宣傳。
林峯同三哥分組玩扯大纜，着裙嘅徐子珊惟有做評判。
苗僑偉同黃智賢為咗宣傳新劇，玩埋空中游繩。
爛玩已備案Ella舊愛吳卓羲（Ron）惹桃色新聞，同人妻梁靖琪（Toby）喺海南島拍劇飲酒後喺泳池玩埋一堆，Ella劃清界線話：「人哋嘅嘢我唔方便講，但都唔好飲咁多酒，傷肝呀！」至於Ron嘅好兄弟林峯打咗個突，但都維護話：「出埠成班人一齊好正常，大家識咗十幾年，Toby叫我哋做阿哥，會唔會大家過敏咗？不過Ron試過飲完酒攬實我。」
Toby噚日同老公黃敏豪手拖手離開喺觀塘嘅公司，Toby話事前有向老公備案同吳卓羲等人一齊玩，絕對冇影響夫妻感情。黃敏豪力撐老婆話：「冇咁大鑊同誇張，我對Ron印象非常好，過時過節，幾忙佢都嚟拜年，好nice。」會否禁老婆行性感？佢話：「大家係後生仔，唔會咁古肅。」
另外，早前樊亦敏去咗探中風入住療養院嘅劉家輝，佢噚日話劉家輝家好番好多。
