《今日我至瘦》
黃婉曼唔單只塊面瘦咗，原來成個人都瘦埋，前晚佢出動買嘢，見佢瘦到鎖骨現形，腿無半両肉，會唔會減到連個胸都縮細埋㗎？
無綫天氣女郎出身嘅前高登女神黃婉曼嘅樣貌就好似佢之前報嘅天氣咁千變萬化，面形時圓時尖，但依然冇影響到佢嘅受歡迎程度。前晚6點幾面尖尖嘅黃婉曼戴住副大墨鏡同一位女性朋友，喺眾多強國人出沒嘅銅鑼灣現身。起先佢哋喺白沙道一帶左望右望，之後黃婉曼同朋友行咗去富明街賣凉果嘅么鳳老店買鹹鹹濕濕嘅零食。
黃婉曼入到去店員非常好招呼，先後畀咗唔同嘅凉果佢試食，又有話梅、杏脯乾、陳皮等等，前後試咗成五、六款咁多，店員仲好有耐性咁同佢講解，最後黃婉曼就揀咗陳皮，見到佢畀咗一百蚊都係找返幾十蚊就知道價錢唔平。
揀心頭好
食極唔厭
買貴陳皮
拖手等車
食陳皮養聲離開舖頭時黃婉曼發現有記者，就好親切走埋嚟打招呼，仲問記者食唔食陳皮㖭，佢話：「一分錢一分貨，呢度啲陳皮好靚又好食㗎。」佢話因為經常要講嘢靠把聲搵食，所以食陳皮嚟養聲，估唔到黃婉曼個樣雖然變咗，但依然咁親切，抵佢受歡迎嘅。
