黃婉曼重出江湖報天氣，繼續跳脫風格。
香港天文台日前已預測周日寒流殺到，美國國家氣象局國家環境預測中心更預告本港明日早上8時至11時可能下雪，巿民當然關心是否可以留港都可賞雪，《蘋果動新聞》昨日就找來天氣女神黃婉曼重出江湖報天氣。
專心背稿
5年前報天氣一句「跳出香港」入晒屋的黃婉曼，埋位前專心背稿，她得知報道相關落雪資訊，英文名叫Icy的黃婉曼，為免大家一想起她便有股寒意，特別穿上毛衣出鏡，報天氣時全程使出獨有婉曼跳脫風格，她說：「根據天文台的自動分區天氣預報，下周一25號清晨7點，打鼓嶺氣溫會跌至攝氏零下1度，真係好凍呀。」
黃婉曼順利錄影後，即露出鬼馬表情，她接受訪問時說：「今次出鏡有壓力，我好鍾意報天氣嘅工作，好難得經驗，初出道出鏡會口窒窒，容易食螺絲，成日俾人笑，今日錄都緊張。」提到黃婉曼「跳出香港」的金句，她即說：「我以前日日都講呢句，之後冇報，有試過發開口夢講番出嚟。」天文台預告字眼有時考起口齒伶俐的黃婉曼，她說：「一隻字都唔漏得，有時預告到落雪落雨，我唔直接叫大家着衫帶遮，我唔係觀眾阿媽，最多溫馨提示，叫大家咁最好着多件衫同帶把遮。」
預告周一可能出現零下1度氣溫，連天氣先生也被吹走。
在開始錄影前，黃婉曼預早背稿，表現專業。
盧覓雪化身港版Elsa大唱《Let it Go》過足公主癮。
唔信落雪
問到黃婉曼有否期待明天香港下雪？她說：「我唔相信，如果真係，可能地球出現反常情況，萬一凍地方有雪災，真係唔可以忽視大自然嘅威力。我覺得香港巿民想賞雪，不如近近哋去日本、韓國好啦。」香港雖不能賞真雪，但還可以看盧覓雪扮的「港版Elsa」雪雪公主，她穿上花裙大唱《Let it Go》，不用凍冰冰都一樣過癮，盧覓雪表示非常滿意公主look，她得戚說：「呢個造型好靚，屋企啲世姪女都好鍾意扮公主，我可以同佢哋鍊過。」
採訪：比華利、何永寧
攝影：仇志中
from:
http://hk.apple.nextmedia ... 160123/19463507
