張暖雅谷胸喺鬧巿派套，梗係引唔少人去攞啦。
王宗堯、張暖雅同張建聲噚日喺旺角街頭大派安全套，佢哋唔係教大家要有安全性行為，而係為新戲《一路向西》宣傳。以爆乳tube dress上陣嘅張暖雅，引得唔少男士上前狂兼攞套，甚至連攞住拐杖嘅阿伯都嚟湊熱鬧。
王宗堯為咗谷戲亂講嘢，更用言語性騷擾張暖雅。
出言豪放張暖雅話作為女仔要喺鬧市派安全套梗係尷尬，問佢覺得女仔平日應唔應隨身帶備安全套？身旁嘅王宗堯即搶答：「梗係要，女仔要保護自己嘛。」但張暖雅聽到竟然反問：「如果有人強姦我，我係咪仲要拎個套畀佢，同佢講『如果你戴上去，就有北上尋歡嘅感覺』？」身為女仔講啲咁嘅嘢會唔會有引人犯罪感覺呢，王宗堯仲話：「我唔知喺你身上會唔會有北上尋歡嘅感覺。」擺到明出言性騷擾，就算谷宣傳，都要為自己講嘅嘢負責，唔好講得就講。
另外，王宗堯日前被拍到同前女友陳靜（DaDa）撐枱腳，問到大家係咪翻撻？王宗堯話大家係好朋友，又指當日亦有第三者在場：「大家都單身冇所謂，不過暫時大家都有共識唔會翻撻住。」
