【今日我至邪】
何超儀前晚喺殯儀館開騷，真係勇字當頭唔怕邪，佢咁大膽都係想幫抗癌勇士陳偉霖完成心願，一定好心有好報！
抗癌勇士陳偉霖（William）早前為自己搞了一個全港首個生前葬禮，何超儀和盧巧音等前晚為完成他的心願，在紅磡一殯儀館靈堂開騷。超儀百無禁忌，以一身螢光裝扮在場內夾band唱rock歌，她透露今次純粹義演，希望將來死後也有朋友為她開騷。
亞視節目《不一樣的感動》為協助年僅30歲、患上皮膚癌的陳偉霖完成心願，前晚在紅磡福澤殯儀館內舉行音樂會，何超儀、盧巧音和組合朱凌凌等義務參與演出。
患癌青年陳偉霖（左三）邀請超儀（右三）在靈堂開騷，為防癌會籌款。
盧巧音坐在紙紮公仔前自彈自唱。
「遲啲會去拜神」靈堂內搭建了一個小舞台，台上掛有寫着「音符長存」的橫匾，現場有樂隊伴奏，吸引逾百樂迷捧場。
穿上螢光裙及波鞋的超儀打頭陣獻唱，她一口氣唱了四首rock爆歌曲，令全場樂迷high爆，她表示今次沒有收取分文，她說：「聽到喺殯儀館開騷，第一個反應係『吓？』，但知道係William搞嘅，就覺得一定要做，去邊都會去，家搞得成都戥佢開心，因為我好proud of佢，成件事好有意義。」問到是否百無禁忌？超儀說：「我本身信佛，都百無禁忌嘅，但可能遲啲都會去拜吓神。」超儀坦言希望將來死後，朋友也能為她做一點事，她說：「我都叫班friend如果我將來死後，都要開騷唱歌畀我聽，William真係勁，自己有份參與都覺得好犀利。」
獲逾百歌迷捧場，超儀唱得勁high。
善款撥捐防癌會William透露所有嘉賓都是由他親自邀請，感激他們的幫忙，而今次的演出亦有叫入場人士捐款，他笑說：「睇完先畀錢，應該唔會有人只係畀一蚊啩。其實今次所有善款，我哋都會捐去香港防癌會一個叫心願計劃嘅活動，希望幫到有需要嘅人。」
