何超儀去年底捲入「飯局事件」，搞到佢成為新聞人物，不過都無損佢喺音樂上發展，前晚佢喺中環舉行向八十年代樂壇巨星致敬音樂會，仲獲一班「飯友」力撐，佢喺現場更重新演繹梅艷芳、張國榮、陳百強和羅文嘅經典金曲。
為配合主題，超儀以80年代嘅造型上陣，就連一班支持佢嘅老友都大玩80年代look，當中徐濠縈、24味嘅阿傑、梁漢文夫婦、鄭希怡、杜如風、郭偉亮、葉佩雯、曾國祥及潘世亨等都有捧場。
以一身80年代打扮開騷嘅何超儀大唱哥哥、阿梅等人嘅金曲。（左起）郭偉亮、葉佩雯、Karen、梁漢文同杜如風前晚都扮晒嘢撐場。
揼霆鋒心口拍MV
超儀透露新MV將於6月推出，搵咗謝霆鋒公司做後期，佢話：「我揼佢心口，佢話兩兄弟冇計，我叫佢收平啲，唔好唔收錢。個MV拍足三日，轉咗20個妝，真係好辛苦，有日洗頭洗到凌晨5點，洗咗6次都洗唔到，最後惟有放棄。」至於近日傳出陳山聰和何超雲復合成功，超儀即話：「唔答，呢啲嘢唔答。」
from:
http://hk.apple.nextmedia.com/entertainment/art/20130427/18241466
