許志安與鄭秀文自去年3月復合以來，一直打得火熱。早前本刊率先爆二人將於10月到Sammi最愛的東京輕井澤小教堂結婚，近日更火速同居半山新愛巢松園試婚。
怕醜的「Sam Hui」雖然雙雙否認婚訊，但近日Sammi無論何時何地都笑到四萬咁口，看來非謠傳咁簡單。上周四（16日），本刊又獨家撞破「準新郎」安仔相約老友張衞健、蘇永康等兄弟團，秘密到灣仔君悅酒店開會。其間安仔表現雀躍，還擘大喉嚨說：「得啦！總之你哋幫我搞掂。阿公（蘇永康）負責眼鏡，阿Dick（張衞健）就幫我度定啲橋玩大佢……」
安仔、Sammi以前各自為事業打拼，拍拖都十分避忌，但去年「世紀復合」被外界一致看好，二人才高調拍拖。早前Sammi更大方坦承結婚是終極目標：「夢幻婚禮只想簡單隆重，最好唔擺酒，但求天父帶我行入教堂就得。至於生小朋友，依家都冇衝動，適當時候我會選擇領養。」
傾到現青筋
伸懶腰
傾足三個鐘，安仔企起身伸懶腰，又撳住張椅背做掌上壓（下圖），表情多多。
明年初搞Big 4演唱會前，安仔先要忙自己人生大事。當他離開君悅時面對記者提問笑而不答，但仍禮貌周周叮囑記者：「小心撞親!」同Sammi一樣，心情靚爆。
開會分配工作
Sammi講到出口，安仔亦不敢怠慢。上周四（16日）上午11時許，本刊發現安仔相約老死張衞健、蘇永康及同為安仔與Sammi經理人的郭啟華等，到灣仔君悅酒店咖啡廳召開「兄弟大會」。為免張揚，安仔事先訂了coffee shop最隱蔽位置，酒店亦承諾至中午十二時半才開放給客人。
安仔最初表現緊張，不時眉頭緊皺，唧都唔笑，要兩位過來人兄弟先搞氣氛。中後段安仔開始放鬆，企起身滿場飛。記者聽到張衞健提出「接新娘」時眾兄弟以黑超look出場：「眼鏡梗係蘇生（蘇永康）搞啦，開正佢嗰瓣。」蘇永康即時say yes：「放心，保證型死你哋班友！」安仔加把口：「咁阿公（蘇永康）你負責眼鏡，阿Dick（張衞健）幫我度定啲橋玩大佢，阿娘（梁漢文）就搵歌。」相信是籌謀接新娘的鬼主意。而一向錫Sammi的郭啟華亦給予不少意見，盛傳他會寫首婚禮主題曲送給二人作結婚禮物。
兄弟大會開了三個多小時才散場，由主人家安仔埋單。三兄弟步出酒店取車時，記者上前問是否傾婚禮事宜，抵死的蘇永康大爆：「係呀！傾許生（指着安仔）啲嘢囉！」但即時被安仔㩒住，手指指「恐嚇」他：「唔好亂講嘢呀！」
記者邊行邊追問安仔打算在哪裏擺酒，他只笑而不語。當記者笑他「咁大個人仲怕醜」時，他笑了兩聲，十分受落。記者再返轉頭追問健仔及蘇康，但蘇只不斷重複：「許志安答幾多就幾多，我冇嘢講。」
張衞健是眾兄弟中最口密一個，他只向記者說：「乜咁多人呀！」便匆匆攞車走。
調好身體等嫁
正忙於與劉德華拍攝杜琪峯新片《盲探》的Sammi，婚期將至亦特別風騷。剛過去的8日及19日是安仔及Sammi的生日，據知兩人為生日專程向公司攞假，但愛巢松園外布滿記者，故二人連日來均未有外出。待嫁Sammi為了以最fit狀態做龍年新娘，不單努力做運動，早前更中西合璧睇醫生，醫好其耳水不平衡及濕疹。周一（20日），記者往《盲探》片場探班，Sammi滿場飛撩工作人員傾偈，又不時跟華仔、杜Sir密密斟，待嫁心情果然靚。
Sammi趕工待嫁
周一（20日）放完生日假的Sammi歸隊拍《盲探》，在片場心情大靚，與助手傾到失儀喪笑。
Sammi好事近，與她頗friend的劉華及杜琪峯也受感染，拍攝現場氣氛輕鬆，連出名惡的杜Sir亦笑面迎人。
Sammi微博展風騷
8月19日是Sammi四十大壽，在生日前夕，她親自煎牛扒，更放上微博：「味覺能不泛起漣漪嗎？嘻嘻！」Sammi咁風騷，一睇就知今年有安仔陪過生日特別開心啦！
愛心牛扒
猛男賀壽
風騷放工
