自從陳豪戀上陳茵媺，暫時「封盤」，而吳卓羲同黃宗澤又雜食搞到一鑊粥，乖乖仔馬國明即時榮升為TVB筍盤2號！多女圍就一定㗎嘞，不過當事人受唔受呢？又係另一回事囉。
呻到樹葉落
沈卓盈一坐低就好多嘢要呻，Toby一於少理，掛住食。馬明都算好同事，應酬咗兩句。
早前啦，媽咪姐去電視城西餐廳嘆個lunch，就見拍緊《戀愛季節》嘅馬明，一拖已婚嘅Toby（梁靖琪），再拖單身嘅沈卓盈齊齊開餐。嗰日筍盤2號好好胃口，叫咗碟黑椒雞扒飯猛咁扒，但化行妝嘅沈卓盈睇嚟心情麻麻，揦口揦面。媽咪姐見出名nice爆嘅馬明，初頭都有同呢位前港姐傾兩句，但始終扒飯緊要啲！一於低頭密密食，搞到無人理嘅沈卓盈扁晒嘴。嗱，呢次媽咪姐就buy馬明呀！不嬲「民以食為天」，萬大事都好，食完至講！
