《2012年香港小姐競選》搞足2個月，終於在週日（26日）決勝，是非港姐湯洛雯（Roxanne）挾湯鎮業侄女之名，未正式比賽已先奪「旅遊大使獎」及新增「美麗昇華大使獎」，成為頂頭大熱。大熱順利封后固然開心，但據知早獲樂易玲幫佢鋪路，等佢埋位開劇，選完即刻做小花，替補姐仔空缺。
25歲的湯洛雯（Roxanne），因外形討好及有「湯鎮業侄女」的背景，開波以來一直都係1賠0.1大熱。
5呎7吋高的湯洛雯，34、26、36的身材不過不失，但上月尾到蘇梅拍外景時，湯換上三點式泳衣，因過分縮肚顯得身形怪異。
鋪定演員路
奪港姐冠軍未必最so，好似08年只得季軍的馬賽，選完港姐後電視劇拍完一套接一套，同屆的冠軍hea爆張舒雅直頭連后冠都冇埋。
近年無綫鬧「演員荒」，一有機會便四處發掘新人材，而每年身為資源部總監的樂易玲亦會向港姐埋手，發掘新女做花旦，據知今年樂大媽睇中演藝世家出身的Roxanne。據幕後人員透露：「每年樂小姐都會喺港姐堆中揀人，俾佢揀中拍劇嗰啲，通常唔會有三甲，因為三甲嗰年要四圍去親善、又要代表香港參選其他比賽搞足成年。今年樂小姐一早已欽點湯洛雯，仲order定Tommy（戲劇總監梁家樹）度定套劇畀湯洛雯選完就拍，湯洛雯不知幾淡定。」週日（19日）湯洛雯亦說：「有冇獎都係平常心，選完就知結果囉。（聽講樂易玲已欽點你拍劇喎？）我唔知呀，有機會拍劇都好開心，好想試！」未選已有條鋪好嘅靚路行，恨死人咩！
大媽關注
上週五（17日）十位應屆港姐要戴住大會贊助的眼鏡行catwalk，雖然Roxanne輸咗，話晒有老豆湯鎮宗（左）及叔父湯鎮業（右）撐腰，又有樂易玲做評判，放心啦，一切有樂大媽安排！
7月中選旅遊大使當日，佳麗黄心穎（小圖）拗出7字腰跳中國舞，都不敵甩嘴棟篤唱的湯洛雯，輕易攞「旅遊大使獎」！
假直選
香港小姐競選今年又玩噱頭以全民投票形式選港姐，由大會評判選出三甲，再由觀眾用電話、網上及短訊形式投票，俾袁彌明勁寸只能三揀一，鬼係直選，而tvb.com現時最高的網上人氣榜三甲，以19號黄心穎領先，8.26齊齊監察吓TVB係咪假民主先！
冷腳
．23歲的黄心穎，早前以7字腰跳中國舞，雖然仍輸畀湯洛雯，但有舞蹈底子的她，日前為決賽綵排時，被知名排舞老師Sunny Wong點名讚，有機冷腳跑出。
．26歲的陳潔玲、有翻版陳妍希之稱，雖經常有負面報道，但一直無損人氣度。
大熱
．25歲的湯洛雯，一直為大熱三甲，即使有時表現不佳，仍先拔頭籌奪兩個獎項。
