最近盛傳陳志雲「棄」查小欣，「捧」吳綺莉上位，取代其商台節目黃金主持位置，事隔一日，查小欣又公然同無綫非戲劇製作總監余詠珊會面，話會幫無綫主持一個類似《志雲飯局》嘅節目，劇情峰迴路轉。不過FBI收到風，查小欣今次咁樣落商台面，真係激嬲咗志雲。
其實，余詠珊一向同志雲面阻阻，余仲經常同志雲唱反調，好似之前商台迫走林曉峰（阿Lo），余就即刻搵阿Lo返無綫做《反轉三周1/2》，聽到查小欣被棄，余的確係想搞小動作。據知，查小欣係繼林海峰，商台第二大高薪員工，如果佢要接其他job，一定要志雲批准㗎，今次事先張揚做無綫節目，完全當志雲冇到，梗係即刻收大信封啦！
查小欣主持的《查篤撐》足足做咗15年，早前佢宣布放大假，仲未交代節目變動，馬上傳出之前主持無綫收費台《女人有話兒》但劣評如潮的吳綺莉，會開咪以《可圈可點》取代其節目，陳志雲仲話欣賞吳綺莉工作夠投入。
