陳志雲前晚出席喺圓方舉行嘅「夏日國際電影2014開幕典禮暨首映之夜」，同場嘅仲有莊思敏、余安安、杜琪峰等等。
大台最近有個畀網民質疑做假嘅真人騷節目，當中一位參加者Meggie，俾網民話似陳志雲同余詠珊混合體。陳志雲就話唔介意，因為有嘢可以畀人寫，網民開心就冇所謂，陳志雲仲話：「我冇啲沒女咁有性格，佢(Meggie)開頭講嘢把聲好似小朋友，我學唔到。」
記者問佢係咪真係冇唔開心？佢就好大方咁話：「冇，都只係網民玩下，第日宣傳不如搵埋我，得啖笑。」
又有網民話個Meggie都似余詠珊，陳志雲話：「我都冇諗過，咁講又幾似喎，不過其實都唔似，余詠珊啲牙都唔係咁。余詠珊成日都著涼鞋，佢腳趾甲相當優美。」
之後陳志雲又講番Meggie，佢話：「其實唔好話人個樣靚唔靚，佢改咗個髮型，整下啲牙都唔係好差。」
講到呢個真人騷節目收到投訴話係造假，陳志雲就話：「其實爭議性節目，都會引出好多話題，不過啲導師教人嘅態度，睇完都會令人唔舒服。」
講到呢個節目有成500宗投訴，陳志雲就話：「咁咪即係多人睇囉，唔係喎，亞視冇人睇，都有成萬宗投訴。」
from:
http://hk.apple.nextmedia ... 140814/18831229
