大部分藝人出盡法寶保護屋企人，蒙面、走後門乜都做齊，你睇劉華個女，由出世到𠵱家都未曝過光，就知佢用咗幾多心機避免愛女被點相啦。
偏偏佘詩曼啱啱相反，前排分別將媽咪、細佬同侄仔嘅相放上微博，仲係冇遮樣冇打格，大大個頭任睇，相中人笑得不知幾開心！其實阿佘一向少講家庭，最多只會帶埋媽咪一齊出活動，突然咁高調晒親情，唔通想話畀全世界知，冇拖拍都可以好開心？
阿佘同佘媽生得一個餅印樣，早前佘媽生日，阿佘專程由內地趕返香港慶祝。
阿佘同細佬Darce感情要好，09年細佬結婚，阿佘喺婚禮喊到收唔到聲！
阿佘個侄仔雖然眼仔細細，但笑起上嚟同姑姐都幾似樣。
