懷孕近5個月嘅周家蔚，自爆豪花5千蚊買BB用品。
周家蔚同洪天明結婚後話咁快有咗，家差唔多5個月，前晚佢同另一個大肚婆羅敏莊、李思欣返無綫錄影《千奇百趣東南亞》節目，大肚仲着吋半高踭鞋嘅家蔚遲大到，佢嚟到即刻知衰道歉：「對唔住，頭先掛住買BB嘢，除咗要買畀自己，文頌嫻又就生，BB嘢真係好難揀，買咗幾粒鐘。」
家蔚話以前鍾意買名牌，覺得自己工作辛苦要獎勵，家大咗肚好少買貴啲，留番買畀BB：「今日買咗5千幾，之前BB展又買咗千幾，仲有好多嘢要買，又買咗成萬蚊花膠、海參同冬蟲草，坐月唔補唔靚，最緊要靚。」
周家蔚冇老公陪過生日，惟有同好友去澳門提早慶祝。微博圖片
過大海贏錢家蔚話老公天明喺佛山做嘢，要拍到出年一月佢臨生先返嚟，就算嚟緊星期六自己生日，都陪唔到佢慶祝，家蔚扁晒嘴話：「見佢喺微博祝鄭嘉穎生日快樂，我真係有啲妒忌。」天明搵多啲畀佢使啫，家蔚睩大眼話：「我使自己錢㗎，佢啲錢使喺屋企。」不過家蔚都唔寂寞，前幾日同朋友去咗澳門玩，仲賭錢贏咗800蚊鬼咁開心。
