蚊蚊（萬綺雯）轉會無綫第一炮《老表，你好嘢！》就擔正做女主角，拍住郭晉安同王祖藍兩個住家男，包唔會傳緋聞，又可以嘻嘻哈哈，無綫真係唔話得。
早前酷熱天氣下，劇集喺中午最曬時段拍外景。當日三十幾度高溫隨時中暑，好在呢場戲有廣告商贊助，安仔同蚊蚊一人一樽涼茶，邊飲邊拍。媽咪姐聽到安仔同蚊蚊講：「涼茶可以舉高啲喎，大家睇得清楚啲嘛，roll機嗰陣都可以飲兩啖，順便消暑，不過細細啖就夠，如果唔係要搵廁所，哈哈！」安仔果然唔孤寒入錢落蚊蚊袋喎！
當日劇組有涼茶贊助，安仔同蚊蚊每人手執一支嘢飲，大收宣傳之效！
大熱天時拍外景一定滴晒汗，好在有專人幫蚊蚊抹汗補妝，睇嚟TVB都相當愛錫蚊蚊呢位新花旦喎。
