媽咪姐做咗幾十年人，有咩未見過！好似森美呢啲成日懶勁、得得戚戚嘅人，平日慣咗寸人搞事，今日就親身示範乜嘢叫「寸極生悲」喇！
星期一（6日）晚，佢上草蜢嘅《環球世界明星賽》做嘉賓，話說佢錄第一Part《環球世界放假啦》時，嘉賓咪要對住鏡頭影相嘅，影到最後一張，森美就懶型跳起「大字馬」，點知……嘭，爆呔呀！佢條褲嘅褲襠位爆出一大個窿，露出紅色格仔孖煙囱。平時寸寸貢嘅森美即時一臉尷尬，而草蜢三子當然笑到碌地，仲「嗱嗱聲」行埋去連環寸佢。
不過，笑飽咗嘅草猛都算有人性，幫森美除咗件外套遮住個八月十五，而森美呢？梗係死撐：「好彩今日着孖煙囱啫，冇咁尷尬！」
草蜢爆笑幫拖
一向招積嘅森美，咁樣當眾出醜，即時笑唔出。同狂笑跑嚟贈興嘅草蜢，形成強烈對比！
笑完一輪，草蜢就叫森美除咗件褸去遮爛褲，蘇老闆仲衰衰咁走去掀佢件褸，陰功豬咯。
