星期日晚舉行嘅「新城國語力頒獎禮」，個show六點幾做到十一點幾，頒足121個獎項，名副其實豬肉獎，睇到媽咪姐頸都梗埋。英皇嘅容祖兒，雖然奪得「全球最受歡迎至尊歌手大獎」、「年度歌曲」等獎，成為大贏家，但竟然唔及葉蒨文搶鏡。事關媽咪姐縱觀全場，發現一眾中港台歌手都着得非常密實，反而五十有一嘅莎莉葉蒨文就以低胸大露背示人。果然係老而彌「堅」。
Sally雖然已經5張有多，但身形一啲都唔輸俾一眾18、22嫩女。加埋打羽毛球關係，望落背脊肌肉依然好結實，未見鬆弛。
小豬台上風騷，去到慶功宴全程有兩個高大保鑣傍實。一黑一白，巴閉過CY落區。
羅力威（中）當晚竟然做咗William同阿Sa嘅特大號電燈膽。
呢個人食韭菜唔食葱㗎，咁唔通氣嘅？﹙設計對白﹚
