洪天明返咗內地拍劇，但買定攝錄機畀周家蔚拍片留回憶。微博圖片
啱啱宣佈有咗三個月身孕嘅周家蔚（Janet），噚日凌晨喺微博上載咗肚裏BB嘅超聲波掃描相，話咁快個BB已經成咗形，噚日喺屋企休息緊嘅Janet同馮仁昭通電話，佢話張相係兩星期前第二次檢查時影嘅，雖然成咗形，但醫生話都未準確睇到係乜嘢性別，最快要第四個月至知係仔定女。
周家蔚前兩星期幫BB做嘅超聲波掃描，睇到BB有特別反應。微博圖片
得閒玩自拍Janet話：「嗰日檢查天明都有陪我去，大家見到BB既開心又激動，佢就不自覺咁同BB講咗句hello，自己都忍唔住笑咗出嚟。」最神奇係見到BB喺裏面彈咗幾下，後來至知原來係打「思噎」，Janet話天明送咗部有自拍功能嘅攝錄機畀佢，等佢得閒可以自拍同BB傾偈片段，Janet啲朋友同佢講遲啲BB再大啲，唔開心就會踢下你，所以Janet好期待咁奇妙嘅時刻，佢話等個肚大啲至攬住個肚同BB傾偈喎。
Janet暫時未同BB傾偈，反而同佢屋企嗰幾隻狗講，第時BB出世唔好呷醋，而搬嚟同Janet同住方便照顧佢嘅周媽媽，就成日攞本聖經對住BB讀，希望佢一出世就乖乖哋。
