朝中有人好辦事，陳法拉有Neway大太子男友薛世恒開水喉力撐，加盟「星煥國際」做一姐，其處女大碟《Beautiful Life》更於本周二（31日）面世。
法拉威到盡以「老闆娘」身份出碟，星煥當然總動員幫手宣傳，因此連累同公司組合農夫的個唱，在宣傳不足的情況下被迫腰斬。上周六（28日），農夫兩位成員陸永及C君，分別在微博大嘆無奈，而其經理人DJ Tommy更明寸：「依家搵唔到Herman（星煥行政總裁及董事總經理），可能忙緊法拉隻碟啦！」
7月31日高調出碟
Neway大少奶陳法拉周二（7月31日）正式推出處女大碟，她在其TVB個人網頁內高調宣傳，唱片公司更總動員為她谷碟，跑去各大電台宣傳她的新歌。
農夫7月初出完新碟，原定本月11日於九展Star Hall舉行《雙囍臨門演唱會》，不過臨門一腳，「星煥國際」竟於上周五（27日）晚通知他們取消個唱。翌日，農夫兩位成員分別在微博表示：「昨天收到唱片公司通知，公司決定取消8月11號的雙喜臨門演唱會。也許是宣傳不足、準備時間不足、入座不足……我們及經理人DJ Tommy都感到非常突然及無奈。」消息一出，據知唱片部人員議論紛紛，私底下更有人表示公司為捧陳法拉，要犧牲農夫。
農夫的演唱會本於8月11日舉行，因為唱片公司唔肯投放資源，搞到宣傳欠奉，就連海報都用舊的。農夫為自救，不時在微博發功，其經理人DJ Tommy亦出一分力，可惜最後都要取消。《蘋果日報》圖片
谷法拉棄農夫
據唱片公司人員透露：「法拉要求高，好緊張呢隻處女碟，成日叫Herman谷多啲宣傳。佢隻新歌〈一半〉早前派台，仲日日問我哋班DJ嘅反應點。講真，公司都揼咗好多錢幫佢搞宣傳啦。佢一出聲，我哋邊敢唔幫手。而農夫同我哋只係以project形式合作，老闆梗係冇咁睇重，演唱會變相唔夠人手同宣傳費囉！到上星期Herman睇到農夫個唱得三成幾入座率，索性取消埋佢，話遲啲先再搞，我哋都好無奈！」
據知農夫經理人DJ Tommy收到個唱「被叮」消息後，曾於電話中與Herman發生爭執，雙方各持己見。本刊記者透過電話聯絡DJ Tommy、陸永及C君，三人提到個唱被腰斬均顯得非常失望與無助，更口徑一致埋怨Herman連電話都唔覆。
問到取消個唱的理由，陸永講明不會與唱片公司理論，但DJ Tommy卻鬧爆不合理：「開個唱起碼要有三個月時間預備，佢哋得一個月宣傳，唔好諗住第一日賣飛就會爆晒。我哋之前搞嘅演唱會都係賣飛到最後一日。」
早於7月中，農夫無聲無息推出新碟，宣傳活動唔夠，惟有自己拍膊頭去電台搵DJ好友幫手。兩人更在一次電台宣傳中碰到陳法拉，當然要搵老闆娘幫自己宣傳啦！
7月中
出碟冇人知
陸永搵女幫口
剛為人父的陸永，最近亦放了一張囡囡一穎食佢隻新碟的照片上微博，借女兒把口賣碟，真有諗頭。
微博公開道歉
上周六（7月28日），農夫在其微博內宣布演唱會取消，除了向歌迷交代退票事宜外，亦不忘向各受影響的單位道歉。
星煥國際的幕後大老闆是Neway大少薛世恒，旗下歌手除陳法拉外，還有鄭欣宜、鍾嘉欣、胡鴻鈞及許廷鏗等。今年二月舉行春茗，行政總裁及董事總經理Herman率領眾人影大合照。《蘋果日報》圖片
談到宣傳不足，三人齊心同插Herman，DJ Tommy更愈講愈嬲：「一開波話開個唱，我都不斷提醒唱片公司做多啲宣傳。我覺得唔對路啦，個唱海報沿用大碟宣傳海報都唔在講，我身邊好多朋友都話唔知佢哋開個唱。宣傳唔夠，真正原因係唔夠財源。（有冇向Herman反映過？）連助手都搵佢唔到，我點搵佢？佢可能忙緊搞法拉隻碟啦，但農夫開個唱都係大件事囉！」
C君亦語帶雙關說：「依家都仲未搵到Herman，可能佢要避啦！（覺唔覺公司資源撥晒去宣傳陳法拉隻新碟？）我只可以講我哋啲宣傳方法錯晒，而法拉係另一個故仔，好長篇㗎！」今次與星煥合作開個唱搞到一鑊泡，陸永直言等完約便各行各路：「佢肯俾幾百萬出嚟再搞，我實OK㗎！不過完咗份約，我哋都會搵第二間唱片公司合作。」個唱無啦啦要讓路，又難怪農夫會對唱片公司心淡。
