最近喺《護花危情》跑出嘅「巴打」羅鈞滿，因為死得轟烈成為萬人like、又被爆同靚女主播張文采熱戀中，即刻人氣急升。不過FBI收到風，話羅鈞滿原來有鋪溝女主播癮，前度就係曾喺now新聞台做主播嘅葉文炘，最近佢仲瞞住張文采同葉文炘翻撻，成日鬼祟叫葉文炘上佢土瓜灣屋企過夜！上個禮拜葉文炘生日，巴打仲為咗氹女友，叫陳豪拍咗段短片賀葉文炘添！
FBI即刻打畀羅鈞滿，佢一聽傳聞反應激動：「黐線！冇可能！我同佢分咗手之後都冇聯絡，點會翻撻呀？上我屋企更加冇可能，我唔係隨便叫人上我屋企嗰啲人嚟㗎！」
巴打仲話由細到大都係風頭躉，唔排除自己俾人陷害喎：「我以前讀書就乜都有份、又夾band咁，都有啲師兄師姐唔鍾意我，覺得我愛出風頭。人哋講我唔緊要，但係將事實講出嚟我覺得一定要囉！」雖然唔可以證實巴打踏兩船，但就證明咗佢連嗒2位靚女主播，識食喎！
葉文炘曾經係now新聞台女主播，不過最近已經轉到大和香港權證銷售部任聯席董事，即係「輪后」靚女又叻女，羅鈞滿識食喎！
喺葉文炘微博搵唔到同羅鈞滿嘅合照，但就有佢同陳豪影嘅相。知「前度」鍾意陳豪，羅鈞滿即刻「做嘢」，如果咁都話冇嘢，FBI唔信囉！網上圖片
喺《護花危情》尾段慘死，羅鈞滿話超抵死：「我本身唔多fans，但呢一幕like嘅人竟然過萬，真係好感動！」
