今年四月司棋姐同King Sir（鍾景輝）合演舞台劇《金池塘》，因為太受歡迎，大會決定加場。而今次安排仲有個好特別嘅地方，就係司棋姐個乖女葉子青同女婿黃安信，將會喺劇入面做番司棋姐嘅女同女婿。話說之前扮演司棋姐劇中女兒嘅舞台劇演員啱啱有事演唔到，子青就自動請纓幫媽咪手。佢同老公都喺加國AI電台做嘢，今次能夠一齊請假返香港，真係好難得。
媽咪姐前兩日去過睇綵排，見到司棋姐不知排得幾冧。原來乖女同女婿今次返港，就住喺司棋姐屋企，佢哋一齊排戲，有時三人撐枱腳，有時去街市買餸返屋企煮吓飯仔。台上台下都溫溫馨馨，咁咪皆大歡喜囉。
台上合拍演出
李司棋舞台經驗豐富，不過女兒子青（左）完全係新手。好彩子青有媽媽私底下幫佢惡補，綵排時對住前輩劉錫賢都表現OK㗎。
台下密密送禮
子青知道媽媽近排打乒乓波修身，特意送上一大袋乒乓球，一家人和和諧諧咁咪好囉。
