無線近期構思新劇角色都幾鍾意加插啲同性戀劇情，好似而家播緊嘅重頭劇《珠光寶氣》咁，林保怡同黃德斌就一段撲朔迷離感情線，睇到大家好疑惑。嚟緊又有新組合，由李司棋、陳法拉、李思捷、伍詠薇等主演嘅新劇《有營煮婦》中，有一半韓籍血統嘅洪天明，就會同印籍嘅喬寶寶有一段錯摸斷背緣。
喬寶寶（左）同洪天明將會演繹一段同性感情，兩個噚日嘟嘴熱身。
陳法拉今次一改形象，以短髮四眼造型出現。
忍頭油體味
噚日佢哋喺將軍澳電視試造型，喬寶寶介紹角色時仲手多多摸洪天明屁股，又扮晒親密，睇到旁邊伍姑娘忍唔住哈哈大笑，相信呢對充滿異國風情嘅斷背組合有啲火花。今次司棋姐同法拉又再次做兩母女，劇集取名煮婦，當然係要煮得一手好菜式，司棋姐會擔當呢個角色，不過佢而家體重已經超出標準，所以佢話：「只會煮，唔會食，要忍口。」劇情會講述女性對婚姻嘅睇法，司棋姐經歷過婚姻失敗，佢話：「我呢啲好小事啫，到而家唔會俾呢啲嘢影響自己，以前後生就有諗搵一個男友乜嘢都要以我為先，但識到之後就調番轉，我以佢為先，仲唔介意對方有頭油同身上一陣陣臭味，仲會幫對方親手洗襪添，所以愛一個人係要付出。」
司棋姐喺新劇《有營煮婦》扮演廚藝高手，仲大爆以前另一半點難頂。
http://appledaily.atnext. ... art_id=12118139
