因為公主病，將無綫筍盤二號馬國明嚇走嘅胡定欣，一直被傳對前度念念不忘，甚至主動爭取合作機會，搏翻撻。
早排《壹》仔喺中環巡邏，見到胡定欣同個望落有幾分似王祖藍嘅戴帽男，一齊喺歌賦街agnés b.cafe歎茶，吹足個幾鐘，之後胡定欣仲做埋司機，送對方返西半山屋企。
唔知胡定欣係咪俾個戴帽男搞到心花怒放，停車落客，竟然忘我到一嘢將架Golf隊埋前車，貼實人哋個車屁股。之後見到《壹》仔，兩個仲驚到擘大口，手指指，勁誇張！唔知以為佢哋專登交戲俾《壹》仔。
唉，做賊咩！其實戴帽男望落十成九似閣下「姊妹」，八珍都feel到，馬國明唔會誤會嘅，放心！
飲tea個幾鐘，胡定欣同對方傾到郁晒手，之後仲做埋柴可夫。
停車停到隊住前車屁股，胡定欣傻吓傻吓，戴帽男走為上着。
