天氣熱死人，媽咪姐最like嘅娛樂就係行吓商場，睇吓新鞋扮靚靚。早幾日又係中環ifc，媽咪姐就撞到何超儀同老死梁漢文老婆Karen喺連卡佛睇鞋。當日，何超儀好快睇中咗一對鮮紅色嘅高踭鞋，試咗一陣都好滿意，仲孖住另一名友人繼續睇鞋，反而Karen就冇佢哋咁好氣，一個人自己走先。
等緊試鞋時，何超儀把握時間，同試緊鞋嘅友人傾吓鞋經，實行分秒必爭。
其實置吓新裝都啱嘅，事關何超儀近日被《蝙蝠俠》監製Charles Roven睇中，搵佢擔正驚嚇片《Open the Grave》，咁佢自然要積極啲，添番啲衣裝啦。尤其係高踭鞋，冇番三、四吋墊底，點同外國明星拍埋呀！
何超儀攞起隻鮮紅色高踭鞋，睇咗一陣，就決定着上腳試吓。
梁漢文老婆Karen都試咗一輪鞋，但似乎唔多啱心水。最後佢仲一個人走先，唔知係咪約咗梁炳撐枱腳呢？
近日何超儀亦忙於出騷，早前出席成都Big Love演唱會。當晚佢冒雨為fans獻唱。咁勤力，媽咪姐都撐佢買多兩對鞋！
